पर्सा । जिल्ला प्रहरी कार्यालयले श्रोत नखुलेको ठूलो परिमाणको हुण्डी कारोबारमा संलग्न तीन जनालाई पक्राउ गरेको छ। विशेष सूचनाका आधारमा खटिएको प्रहरी टोलीले वीरगञ्ज महानगरपालिका–१० मकालु चोक क्षेत्रबाट उनीहरूलाई नियन्त्रणमा लिएको हो।
पक्राउ पर्नेमा भारत बिहार राज्यको बेतिया जिल्लाका ५० वर्षीय अनवर मियाँ, २२ वर्षीय महमद केफ अहमद तथा मोतिहारी जिल्लाका ४८ वर्षीय फूल महमद रहेका छन्।
प्रहरीका अनुसार उनीहरू सवार मोटरसाइकल र साइकिलको तलासी लिँदा श्रोत खुलाउन नसकिएको नगद रकम बरामद गरिएको हो। अनवर मियाँ र महमद केफ अहमद सवार BR 22 H 6338 नम्बरको मोटरसाइकलबाट ३ लाख ७१ हजार ९ सय ५० रुपैयाँ बरामद गरिएको छ भने फूल महमद सवार साइकिलबाट ३ लाख रुपैयाँ फेला परेको छ। यसरी कुल ६ लाख ७१ हजार ९ सय ५० रुपैयाँ श्रोत नखुलेको नगद रकम बरामद भएको जिल्ला प्रहरी कार्यालय पर्साले जनाएको छ।
पक्राउ परेका व्यक्तिहरूलाई मुलुकी अपराध संहिता, २०७४ को दफा १२५ (क) बमोजिम हुण्डी कारोबारसम्बन्धी कसुरमा पर्सा जिल्ला अदालतबाट तीन दिनको म्याद थप अनुमति लिई थप अनुसन्धान भइरहेको प्रहरीले जानकारी दिएको छ।
जिल्ला प्रहरी कार्यालय पर्साले अवैध हुण्डी कारोबार नियन्त्रणका लागि निगरानी तथा कारबाहीलाई निरन्तरता दिइने स्पष्ट गरेको छ। यस सम्बन्धी जानकारी प्रहरी नायब उपरीक्षक राजु कार्कीले दिएका हुन्।
