सर्लाही । नेपाल प्रहरी प्रधान कार्यालय, प्रदेश समन्वय विभाग, नक्साल काठमाडौँका विभागीय प्रमुख प्रहरी अतिरिक्त महानिरीक्षक डम्बर बहादुर बिकको नेतृत्वमा आएको टोलीले जिल्ला प्रहरी कार्यालय सर्लाहीको अनुगमन तथा निरीक्षण गरेको छ।
आज २०८२ माघ २१ गते साँझ करिब १८:१० बजे कार्यालयमा पाल्नु भएका अतिरिक्त महानिरीक्षक बि.क.सहितको टोलीले कार्यालयका सम्पूर्ण शाखाहरूको निरीक्षण गर्नुका साथै कार्यरत प्रहरी कर्मचारी तथा मातहतका सम्पूर्ण प्रहरी इकाई प्रमुखहरूलाई निर्देशन–सम्बोधन गर्नुभएको हो।
कार्यक्रमका क्रममा उहाँले जिल्लाको शान्ति–सुरक्षा अझ प्रभावकारी बनाउने, बदलिँदो परिवेशअनुसार छिटो, छरितो, निष्पक्ष तथा नागरिकमैत्री प्रहरी सेवा प्रवाह गर्ने, साथै अपराध अनुसन्धानलाई प्राथमिकतामा राख्नुपर्ने विषयमा विशेष निर्देशन दिनुभयो।
त्यसैगरी, २०८२ फागुन २१ गते हुन गइरहेको प्रतिनिधि सभा सदस्य निर्वाचनलाई निष्पक्ष, धाँधलीरहित र शान्तिपूर्ण रूपमा सम्पन्न गर्न जिल्ला प्रहरी कार्यालय सर्लाहीले विशेष सुरक्षा योजना बनाई उच्च मनोबलका साथ जनशक्ति परिचालन गर्नुपर्नेमा जोड दिनुभयो।
साथै, सिमानाकाबाट हुने सम्भावित अवाञ्छित गतिविधि नियन्त्रणका लागि कडाइका साथ चेकजाँच व्यवस्था मिलाउनुपर्ने, प्रहरी कर्मचारीहरूले अनुशासनको दायराभित्र रही त्रुटिरहित ढंगबाट कार्य सम्पादन गर्नुपर्ने लगायतका समसामयिक विषयमा उहाँले महत्वपूर्ण निर्देशन दिनुभएको जिल्ला प्रहरी कार्यालयले जनाएको छ।
