दाङ । नेपालका लागि स्विट्जरल्याण्ड सरकारका सहयोग प्रमुख माथियस मायरले लुम्बिनी प्रदेशका मुख्यमन्त्री चेतनारायण आचार्यसित औपचारिक तथा शिष्टाचार भेटघाट गरेका छन् । भेटका क्रममा दुबै पक्षहरूले नेपालमा प्राविधिक शिक्षा र संघीयता मजबूतीका लागि एकापसमा मिलेर काम गर्नुपर्नेमा जोड दिएका छन् ।
बिहीबार अपरान्ह मुख्यमन्त्री तथा मन्त्रिपरिषद् कार्यालय, राप्ती उपत्यका देउखुरीमा मायरसित भएको भेट र कुराकानीमा मुख्यमन्त्री आचार्यले लुम्बिनी प्रदेशलाई समृद्ध – सुदृढ बनाउन प्राविधिक शिक्षाको महत्त्वपूर्ण भूमिका रहेको उल्लेख गरेका छन् । सक्षम र दक्ष जनशक्ति तयार गर्दै मुख्यमन्त्री आचार्यले नयाँ उत्पादनमूलक र सीपमूलक शिक्षाले नै प्रदेशको आर्थिक तथा सामाजिक विकासलाई अगाडि बढाउन सकिने जिकिर गरेका छन् ।
साथै आचार्यले संघीयता सुदृढीकरणका लागि प्रदेश सरकारले महत्त्वपूर्ण भूमिका निर्वाह गरिरहेको बताएका हुन् । प्रदेशहरुलाई अझ सुदृढीकरण बनाउने गरी भूमिका विस्तार गर्न आवश्यक रहेको उल्लेख गर्दै अन्तरप्रदेश समन्वय बढाउन लुम्बिनी प्रदेशले पहल गरिरहेको जानकारी गराएका छन् । त्यसका लागि समुदायमा रहेका सबै पक्षहरूले गम्भीर भएर काममा लाग्नुपर्ने उनको सुझाव छ ।
सातै प्रदेशका मुख्यमन्त्रीहरुबीच गोलमेच सम्मेलन आयोजना गर्ने तथा साझा छलफलको वातावरण निर्माण भएको समेत मुख्यमन्त्री आचार्यले खुशी व्यक्त गरे ।
संघीयता अनुरुपको शासन प्रणाली प्रभावकारी बनाउन तीनवटै तहका सरकारबीच समन्वय अझ कोशे ढुंगो हुनुपर्ने उनको भनाइ थियो । हाल नेपाल भ्रमणमा रहेका स्विट्जरल्याण्ड सरकारका सहयोग प्रमुख माथियस मायरले नेपालसित स्वीस सरकारको मैत्रीपूर्ण सम्बन्ध रहेकाे, संघीयताकाे सुदृढीकरण, नव प्रवर्तनकाे क्षेत्रमा सहकार्यले निरन्तरता पाएकाे चर्चा गरेका छन् ।
भेटघाट तथा कुराकानीका क्रममा आर्थिक मामिला तथा याेजना मन्त्री धनेन्द्र कार्की, प्रमुख सचिव कृष्णप्रसाद काप्री, प्रदेश योजना आयोगका उपाध्यक्ष डाक्टर डिल्लिराज अर्यालको समेत सहभागिता रहेको थियो ।
त्यसैगरी भेटवार्ताका क्रममा नेपाल र स्विट्जरल्याण्ड बीचको मैत्रीपूर्ण सम्बन्ध, नव प्रवर्तन, प्राविधिक शिक्षा तथा दक्ष जनशक्ति उत्पादनका विषयमा समेत गहन छलफल भएको थियो ।
