दाङ । राप्ती गाउँपालिका–४ सुन्दरपुरबाट प्रहरीले अवैध रूपमा ओसारपसार भइरहेको सालको चिरान काठ सहित पाँचवटा मोटरसाइकल बरामद गरेको छ ।
काठ चोरी तस्करी भइरहेको सूचनाका आधारमा इलाका प्रहरी कार्यालय भालुवाङबाट खटिएको प्रहरी टोलीले मंगलबार दिउँसो १:३० बजेको समयमा उक्त काठ र मोटरसाइकल बरामद गरेको हो । प्रहरीका अनुसार देविकोट तर्फबाट सुन्दरपुर आउँदै गरेका पाँच वटा मोटरसाइकलमा साल जातको चिरान काठ लोड गरिएको अवस्थामा फेला परेको थियो । प्रहरी टोलीलाई देखेपछि मोटरसाइकल चालकहरू काठ र मोटरसाइकल छाडेर फरार भएका थिए ।
प्रहरीले बरामद गरेका मोटरसाइकलमा भे ६ प ९९२०, रा ७ प १८९७, रा ७ प ४०९५, रा ४ प २७४३ र लु ५२ प ४९९३ नम्बरका मोटरसाइकल रहेका छन् । त्यसैगरी, घटनास्थलबाट साल जातको चिरान काठ १६ पिस तथा करिब ३४.९८ क्युफिट काठ बरामद गरिएको प्रहरीले जनाएको छ । बरामद काठ र मोटरसाइकलको अनुमानित कुल मूल्य १७ लाख ९० हजार रुपैयाँ रहेको जिल्ला प्रहरी कार्यालय दाङले जानकारी दिएको छ ।
बरामद गरिएका काठ तथा मोटरसाइकल आवश्यक कानुनी कारबाहीका लागि डिभिजन वन कार्यालय दाङ (देउखुरी), लमहीमा पठाइएको जिल्ला प्रहरी कार्यालय दाङले जनाएको छ ।वन पैदावारको अवैध चोरी निकासी तथा ओसारपसार नियन्त्रणका लागि प्रहरीले निगरानी बढाएको जनाएको छ ।
