दाङ । तिहार अर्थात् दाजुभाइ र दिदीबहिनीबीचको आत्मीयता, प्रेम र सद्भाव साटासाट गर्ने पर्व। यही पर्वको अवसर पारेर नेपालकै सर्वाधिक दोस्रो धेरै उपन्यास प्रकाशित गर्नुभएका उपन्यासकार सबिन प्रियासनले आफ्ना दिदीबहिनीहरूलाई उपन्यास उपहार प्रदान गर्नुभएको छ।
तिहारको अवसरमा दिदीबहिनीहरूसँगको भेटघाट, टीका तथा पारिवारिक जमघटका क्रममा उहाँले आफ्ना साहित्यिक कृतिहरू उपहारस्वरूप प्रदान गर्नुभएको हो। उहाँले उपहारका रूपमा पुस्तक रोज्दै साहित्य र पठन संस्कृतिको प्रवर्द्धन गर्ने सन्देशसमेत दिनुभएको छ।
तिहारमा दाजुभाइले दिदीबहिनीलाई विभिन्न सामग्री उपहार दिने परम्परा रहँदै आएको छ। तर प्रियासनले पुस्तकलाई उपहारका रूपमा प्राथमिकता दिएर ज्ञान, चेतना र सिर्जनशीलताको महत्त्व उजागर गर्नुभएको छ। उहाँका अनुसार पुस्तक यस्तो उपहार हो, जसले मानिसलाई मनोरञ्जन मात्र होइन, जीवन बुझ्ने दृष्टिकोण र सकारात्मक सोचसमेत प्रदान गर्छ।
पछिल्लो समय मोबाइल तथा सामाजिक सञ्जालको बढ्दो प्रयोगसँगै पुस्तक पढ्ने बानी कमजोर हुँदै गएको चर्चा भइरहेका बेला पर्वलाई पठन संस्कृतिसँग जोड्ने उहाँको प्रयासलाई साहित्यिक दृष्टिले पनि अर्थपूर्णज मान्न सकिन्छ।
प्रियासनले यसअघि पनि जन्मदिन, दशैँ, तिहार तथा विभिन्न पारिवारिक र सामाजिक अवसरमा पुस्तक उपहार दिने अभियानलाई निरन्तरता दिँदै आउनुभएको छ। उहाँको किताब उपहार अभियानले लेखकलाई प्रोत्साहन गर्ने, पाठक बढाउने र समाजमा अध्ययन संस्कृतिको विकास गर्ने उद्देश्य राखेको छ।
साहित्य सिर्जना र पत्रकारितालाई सँगसँगै अघि बढाउँदै आउनुभएका प्रियासनले विभिन्न विधाका पुस्तक प्रकाशन गर्नुभएको छ। उहाँका उपन्यासले सामाजिक यथार्थ, मानवीय संवेदना, पारिवारिक सम्बन्ध र जीवनका विविध पक्षलाई समेट्दै आएका छन्।
तिहारलाई केवल भौतिक उपहार आदानप्रदान गर्ने पर्वका रूपमा मात्र नभई ज्ञान, साहित्य, प्रेम र आत्मीयता बाँड्ने अवसरका रूपमा लिनुपर्ने सन्देश उहाँको यस पहलले दिएको छ।