अख्तियार दुरूपयोग अनुसन्धान आयोगले नक्कली शैक्षिक प्रमाण पत्र पेश गरेर बढुवा भएको आरोपमा राष्ट्रिय नाचघर जमलकी कर्मचारी अञ्जु रञ्जितकारविरूद्ध मुद्दा दर्ता गरेको छ।
नाचघरमा नृत्य कलाकार पाँचौं तहमा बढुवा हुनका लागि रञ्जितकारले नक्कली शैक्षिक प्रमाणपत्र पेश गरेको आरोपमा अख्तियारले मंगलबार उनीविरूद्ध विशेष अदालतमा मुद्दा दायर गरेको हो।
चौथो पदमा स्थायी निक्युति लिई रञ्जितकारले विशेष पढुवाका लागि जनज्योति मावि नवलपरासीबाट कक्षा १० पास गरेको नक्कली प्रमाणपत्र पेश गरेको अख्तियारको दाबी छ।
अख्तियारका प्रवक्ता प्रदीपकुमार कोइरालाका अनुसार उनीमाथि भ्रष्टाचार निवारण ऐन, २०१७ को दफा १२ र दफा २९ को उपदफा (२) तथा प्रचलित भ्रष्टाचार निवारण ऐन, २०५९ को दफा १६ को उपदफा (१) बमोजिम सजाय हुने गरी माग दाबी गरिएको छ।
