काठमाडौं नेकपा मालेका महासचिव सिपी मैनालीले आफ्नो दुर्घटनाबारे सरकारले छानबिन नगरेको प्रति दुःखेसो पोखेका छन् । सोमबार ग्राण्डी अस्पतालमा आफुँलाई भेट्न आएका सञ्चारकर्मीसँग कुरा गर्दै उनले छानबिन नभएको प्रति गुनासो गरेका हुन् ।
मैनालीले आफ्नो दुर्घटनाको पछाडि षडयन्त्र भएको भन्दै छानबिन गर्न आग्रह गर्दै आएका थिए । ‘मैले त यो दुर्घटनालाई षड्यन्त्रको संकेतको रुपमा लिएको छु’, मैनालीले भने, ‘मैले सरकारलाई यो दुर्घटनाको छानबिन गर्न आग्रह गरेको थिएँ तर, अहिलेसम्म कुनै छानबिन गर्ने प्रक्रिया अघि बढेन ।’
उनले आफ्ना पार्टीका नेताहरुले गृहमन्त्री रामबहादुर थापा बादललाई भेटेर छानबिनको लागि आग्रह गर्ने कार्यक्रम रहेको जानकारी दिए । मैनालीले जनाएअनुसार उनको आगामी बिहीबार अस्पतालबाट डिस्चार्ज हुनेछ ।
झापाबाट काठमाडौं आउँदै गर्दा मैनाली सवार कार गत फागुन १४ मा दुर्घटनामा परेको थियो । उनी सवार कारलाई विपरित दिशाबाट आउँदै गरेको पिकअप भ्यानले ठक्कर दिएको थियो । दुर्घटनामा उनिसहित उनका छोरा–बुहारी, नाती र चालक घाईते भएका थिए ।
