प्रहरीले आइतबार थप ५ सय ३ मोटरसाइकल र स्कुटर पक्राउ

प्रकशित मिति : २४ चैत्र २०७६, सोमबार ११:२७

(महेन्द्र सिंह) बाँके चैत २४ लकडाउन उलङ्घन गर्नेहरुका विरुद्ध कडा रुपमा उत्रिएको बाँके प्रहरीले आइतबार बेलुका थप ५ सय ३ मोटरसाइकल र स्कुटर नियन्त्रणमा लिएको छ ।
आइतबार बेलुका प्रहरीले नेपालगन्जका विभिन्न स्थानबाट लकडाउन उलङ्घन गर्ने ५ सय ३ मोटरसाइकल र स्कुटरका चापी नियन्त्रणमा लिएको जनाएको छ । शनिबार मात्र प्रहरीले ४ सय ४१ मोटरसाइकल र स्कुटरका चापी नियन्त्रणमा लिएको थियो ।
लकडाउनलाई कडाईकासाथ कार्यान्वयनका लागि निरन्तरता दिईने र नियन्त्रणमा लिइएका सवारी साधनका चापी लकडाउन समय अबधिभर फिर्ता नदिइने जिल्ला प्रहरी कार्यालय बाँकेका प्रहरी निरीक्षक सुरज खत्रीले जानकारी दिए ।
प्रहरीको यो काम सर्वसाधारणले सकारात्मक रुपले लिएका छन । तर, नियन्त्रणमा लिइएका सवारी साधनलाई प्रहरीले व्यवस्थापन गर्न सकेको देखिएको छैन । जुन स्थानमा नियन्त्रण गरिएको छ त्यही स्थानमा पार्किङ गरेर राख्दा कतिपय सवारी धनीले रातिको समयमा आफ्ना सवारी साधनलाई अर्को चापि प्रयोग गरेर कतिपयले डोर्याउदै पनि लग्ने गरेको पाइएको छ ।
नियन्त्रण गरिएका सवारी साधनलाई कुनै निश्चित स्थानमा लगेर पार्किङ गर्न सके यो कारवाही थप प्रभावकारी हुने देखिन्छ । त्यसैगरी, सहरको मुख्य सडकमा मात्र नभएर भित्री सडकमा समेत प्रहरी सक्रियताको आवश्यक देखिन्छ ।

प्रकशित मिति : २४ चैत्र २०७६, सोमबार ११:२७