काठमाडौं उपत्यका छाड्न चाहनेलाई सम्बन्धित स्थानमा पुर्याइदिने निर्णयबाट सरकार पछि हटेको छ। यो निर्णय कार्यान्वयन गर्दा झन् जोखिम बढ्ने विश्लेषणपछि उच्चस्तरीय समन्वय समितिले तत्कालका लागि यो निर्णय स्थगित गरेको हो। उप-प्रधान तथा रक्षामन्त्री ईश्वर पोखरेल नेतृत्वको कोरोना रोकथाम तथा नियन्त्रण उच्चस्तरीय समन्वय समितिको बिहीबारको बैठकले उक्त निर्णय गरेको थियो। कुनै छलफल नै नगरि उक्त निर्णय भएपछि प्रदेश सरकारबाट समेत विरोध भएको थियो। भौतिक पूर्वाधार तथा यातायातमन्त्री मन्त्रालयले पनि काठमाडौं बाहिर जानेलाई तत्काल पठाउन नसकिने बताएको थियो। उपत्यकाका मानिसलाई बाहिर पठाउदा कोरोनाको थप जोखिम हुनसक्ने निष्कर्षपछि अन्ततः बाहिर नपठाउने निर्णय भएको हो ।
