दाङको इँट्टाभट्टाबाट भारतीय मजदूरहरुलाई फिर्ता पठाइयो

प्रकशित मिति : ९ जेष्ठ २०७७, शुक्रबार १०:१६

एबिसी संचार दाङका इँट्टाभट्टामा काम गर्ने भारतीय मजदूरलाई नेपालगञ्जको जमुनाहा नाकामा लगेर छोडिएको छ। भारतीय सुरक्षा अधिकारीसँग कुरा भए पनि उनीहरूको घर फर्किन पाउनुपर्ने माग अनुसार बाँकेस्थित नेपाल–भारत सीमा नाकामा लगेर छोडिएको हो।
उनीहरूलाई बुधबार राति २१ वटा बसमा लगेर छोडिएको जिल्ला प्रहरी कार्यालय दाङले जानकारी दिएको छ।
गएरातिमात्रै एक हजार दुई सय ३३ जना भारतीय नागरिकलाई सीमा नाकासम्म पुर्याइएको छ। सीमा क्षेत्रका भारतीय सुरक्षा अधिकारीसँग कुरा गर्न प्रदेश नं. ५ का प्रहरी प्रमुख डिआइजी रविन्द्रप्रसाद धानुक दाङबाट नेपालगञ्ज गएका थिए।
बाँकेका प्रमुख जिल्ला अधिकारी कुमारबहादुर खड्का र डिआइजी धानुकले भारतीय अधिकारीसँग कुरा गरेपछि भारतीय मजदूरलाई फिर्ता गर्ने निर्णय भएको हो।
त्यसअघि जिल्लाका विभिन्न इँट्टा उद्योगमा काम गर्ने भारतीय मजदूरले घर फर्किन पाउनु पर्ने माग गर्दै प्रदर्शनमा उत्रिएका थिए।
मनकामना, राप्ती, बबई, अम्मर, शिवशक्ति, जलजला, गोल्डेन,शुभम, सोनी, जेके, प्रविन लगायतका इँट्टाभट्टामा काम गर्ने एक हजार दुई सय ३३ मजदुरलाई पहिलो लटमा पठाइएको हो।
दाङका प्रहरी प्रमुख एसपी गणेश चन्दका अनुसार जिल्लाका विभिन्न इँट्टा उद्योगमा गरेर ५ हजार बढी मजदूर कार्यरत छन्।