ABC Sanchar
काठमाडौं । अपराधिक समूह’ भनेर प्रतिबन्ध लगाइएको नेत्रबिक्रम चन्द (विप्लव) नेतृत्वको नेकपासँग सरकारले वार्ताको पहल थालेको छ ।
प्रधानमन्त्री केपी शर्मा ओलीकै चाहना अनुसार विप्लव नेतृत्वको नेपाल कम्युनिस्ट पार्टीमाथि २०७५ फागुमा प्रतिबन्ध लगाइएको थियो । तर, गत पुस ५ मा प्रतिनिधि सभा विघटन पछि विकसित राजनीतिक घटनाक्रमका बीच सरकारले विप्लव नेतृत्वको नेकपासँग वार्ताको पहल थालेको हो ।
औपचारिक रुपमै वार्ता थाल्ने प्रयासस्वरुप खानेपानी मन्त्री मणि थापाले नख्खु जेल पुगेर विप्लव नेकपाका नेता हेमन्तप्रकाश ओली ‘सुदर्शन’लाई भेटेका छन् ।
ओलीलाई भेट्न मन्त्री थापा मंगलबार बिहान नख्खु जेल पुगेका हुन् । सुरक्षा स्रोतले मंगलबार बिहान खानेपानी मन्त्री थापा नख्खु जेल पुगेका पुष्टि गरेको छ ।
विप्लव नेतृत्वको नेकपाको संलग्नतामा नख्खुस्थित एनसेल कार्यालयमा भएको बम विस्फोटसँग सम्बन्धित मुद्दामा पक्राउ परेका ओली अहिले ललितपुरको नख्खु कारागारको थुनामा छन् ।
प्रहरीले ओलीलाई काभ्रेबाट पक्राउ गरेको थियो । पूर्व माओवादी पृष्ठभूमिका नेता थापाले वार्ताको वातावरण बनाउनका लागि मंगलबार ओलीसँग भेटवार्ता गरेका हुन् । तर, भेटवार्ताका क्रममा के–के कुराकानी भयो भन्ने विषय भने सार्वजनिक भइसकेको छैन ।
प्रतिबन्ध अगाडि पनि सरकारले विप्लव नेतृत्वको नेकपासँग वार्ता गरेको थियो । विप्लवको नेकपासहित तत्कालीन अवस्थामा भूमिगत रहेका समूहसँग वार्ता गर्न भन्दै पूर्व मन्त्री एवम् तत्कालीन प्रतिनिधिसभा सदस्य सोमप्रसाद पाण्डेको नेतृत्वमा वार्ता टोली गठन गरिएको थियो ।
तर, उक्त टोलीले विप्लवको नेकपासँग औपचारिक वार्ता शुरु गर्न सकेन । वार्ताका लागि विप्लव नेकपाका केही नेताहरुसँग कुराकानी गरेपनि ‘उनीहरु वार्ताका लागि सकारात्मक नपाइएको’को तत्कालीन वार्ता टोलीका संयोजक पाण्डेले जानकारी दिएका थिए ।
वार्ता टोलीले २०७५ पुसमा आफ्नो प्रतिवेदन सार्वजनिक गर्दै विप्लव नेतृत्वको नेकपाले वार्ताका लागि सकारात्मक अग्रसरता नलिएको हुँदा वार्ता प्रक्रिया अघि बढ्न नसकेको जनाएको थियो ।रासस
