(महेन्द्र सिंह)
बाँके । जिल्ला ट्राफिक प्रहरी कार्यालय बाँकेले राजस्व संकलन कार्यलाई तिब्र बनाएको छ।
बाँके ट्राफिकले जिल्लाभरमा ३ दिनको अवधिमा ३ लाख ८३ हजार ५ सय रुपैयाँ राजस्व संकलन गरेको छ । जिल्ला ट्राफिक प्रहरी कार्यालय बाँके कोहलपुरका अनुसार ३ दिनको अवधिमा ५७९ वटा सवारीसाधनलाई जरिवाना तिराएको हो । त्यस्तै ट्राफिक प्रहरीले मापसे गरेका १४ जनालाई कारबाही गरेर १४ हजार जरिवाना तिराएको हो । ट्राफिक प्रहरीले माघ २३ गते १६७ वटा सवारीसाधन कारबाही गर्दै १ लाख राजस्व संकलन गरेको जिल्ला ट्राफिक प्रहरी कार्यालय बाँकेका ट्राफिक प्रमुख प्रहरी निरीक्षक राजु भण्डारीले जानकारी दिए ।
यस्तै माघ २४ गते १४ जना मापसे गरेकाहरुलाई १४ हजार जरिवाना तिराइएको थियो । ट्राफिक प्रहरीले माघ २५ गते २१२ सवारीसाधनलाई कारबाही गर्दै १ लाख ३३ हजार रुपैयाँ राजस्व संकलन गरेको थियो । आज दिउँसोसम्म बाँकेभर ट्राफिक प्रहरीले २ सय सवारीसाधनलाई कारबाही गर्दै १ लाख ३६ हजार ५ सय रुपैयाँ राजस्व संकलन गरेको छ । बाँके जिल्ला ट्राफिक प्रमुख प्रहरी निरीक्षक भण्डारी आएयता ट्राफिक प्रहरीले दोब्बर राजस्व संकलन गरेको जनाएको छ ।
