ABC (क्राईमबिट) कपिलवस्तु । जिल्ला प्रहरी कार्यालय कपिलवस्तुले गत आर्थिक वर्ष २०७६/७७ को तुलनामा चालु आर्थिक वर्ष २०७७/७८ को ७ महिनामा दोब्बर बढी फरार प्रतिवादी पक्राउ गरेको छ । गत साउनदेखि माघसम्म प्रहरीले १२१ जना फरार प्रतिवादीलाई पक्राउ गरेको हो ।
उनीहरुको कैद ४० वर्ष ३ महिना २० दिन रहेको र जरिवानाबापत २५ लाख ४७ हजार रुपैयाँ संकलन भएको पनि कपिलवस्तु प्रहरीले जानकारी दिएको छ । गत आर्थिक वर्ष २०७६/७७ मा भने कार्यालयले ५० जना फरार प्रतिवादीलाई पक्राउ गरेको थियो ।
यस्तै, मुद्दा दर्ता र फर्छ्योट, राजस्व संकलन र लागूऔषध बरामदमा पनि कपिलवस्तु प्रहरीको सक्रियता देखिएको छ । कार्यालयको तथ्यांकअनुसार भन्सार छली गरिएको भित्र्याइएको सामानबाट ३ करोड ६५ लाख ९० हजार संकलन भएको छ ।
यस्तै, उक्त अवधिमा ९६ ग्राम ३३१ मिलिग्राम ब्राउनसुगर, ३७ किलो चरेज, साढे १० किलो अफिमलगायत बरामद गरिएको छ । लागूऔषध कारोबारमा संलग्न ४८ जनालाई पनि पक्राउ गरिएको कार्यालयले जनाएको छ ।
पछिल्लो ६ महिनामा कार्यालयले ३२३ मुद्दा दर्ता गरी १३० वटा फर्छ्योट गरिसकेको छ । गत आर्थिक वर्षमा कार्यालले ५७९ मुद्दा दर्ता गरी २९८ वटा फर्छ्योट गरेको थियो । जिल्ला प्रहरी कार्यालय कपिलवस्तुका प्रहरी प्रमुख एसपी नवराज अधिकारीले विभिन्न किसिमका अपराध, तस्करी नियन्त्रण र फरार अपराधी पक्राउलगायत कामका लागि छुट्टाछुट्टै टिम बनाएर काम गरिरहेको जानकारी दिए ।
झैझगडा, महिला हिंसा सवारी दुर्घटना, फरार प्रतिवादी र तस्करीसँग सम्बन्धित अपराधलाई प्राथमिकतामा राखेर काम गर्दै जाने कपिलवस्तु प्रहरी प्रमुख एसपी अधिकारीले बताए ।
