(महेन्द्र सिंह)
बाँके । नेपालगन्जमा प्रहरीले म्याजिक भ्यानको छड्के चेकजाँच गरेको छ । नियम विपरित सवारी खचाखच भरेर गुडेका ६ वटा म्याजिक भ्यानलाई कारबाही गरेको जिल्ला ट्राफिक प्रहरी कार्यालय कोहलपुर बाँकेका ट्राफिक प्रमुख प्रहरी निरीक्षक राजु भण्डारीले जानकारी दिएका छन । वडा प्रहरी कार्यालय नेपालगन्ज र जिल्ला ट्राफिक प्रहरी कार्यालय कोहलपुर बाँकेको संंयुक्त चेकजाँचमा कागजपत्र नबोकेका र सिट क्षमता भन्दा बढी यात्रु बोकेका ६ वटा म्याजिक भ्यानलाई कारबाही गरिएको हो । त्यस्तै ट्राफिक प्रहरीले ७ वटा सवारीसाधनको कागजपत्र होल्ड गरेको जनाएको छ । कागजपत्र नबोकेर सिट क्षमता बढी यात्रु बोकेको एउटा म्याजिक भ्यान, २ वटा ट्याक्टर र एउटा जेसिबीलाई समेत नियन्त्रणमा लिएको जिल्ला ट्राफिक प्रहरी बाँकेले जानकारी दिएको छ । नेपालगन्जको राँझा चोकमा प्रहरीले ५० बढी म्याजिक भ्यानको चेक जाँच गरेको हो । नेपालगन्जमा प्रहरीले सवारीसाधन चेकजाँचलाई तीब्र पारेको जिल्ला ट्राफिक प्रमुख भण्डारीले बताए ।
