ABC Sanchar
काठमाडौँ । नारायणहिटी संग्रहालयभित्र रहेको सिनेमा हल खुल्ने भएको छ। पुरानो राजदरबार भित्र रहेको सिनेमा हल वैशाखदेखि सञ्चालनमा आउने भएको हो ।
वि.स. २०५८ मा दरबार हत्याकाण्ड भएदेखि उक्त सिनेमा हल बन्द गरिएको थियो । दरबारभित्रको यो सिनेमा हलमा सर्वसाधारणले पनि डकुमेन्ट्री हेर्ने पाउने छन्।
तत्कालीन राजपरिवारका सदस्यलाई सिनेमा हेर्न २०२६ सालमा फिल्म हल बनाइएको थियो। तत्कालीन राजा वीरेन्द्र शाहसहित उनका परिवारका सदस्यको हत्या हुनु पहिले २०५८ सालसम्म यो सिनेमा हल चालु थियो। २०५८ जेठ १९ मा दरबार हत्याकाण्ड भएपछि बन्द रहेको यो सिनेमा हल सञ्चालनको तयारी गरिएको हो ।
सङ्ग्रहालय घुम्न लिइएको टिकटबाट नै फिल्म, डकुमेन्ट्रीसमेत हेर्न मिल्ने व्यवस्था मिलाउन लागिएको छ। वीरेन्द्रको विवाहको भिडिओ खिचेको रिल पनि रहेकोले त्यो पनि देखाउने तयारी छ।
दरबारभित्र सिनेमा हलको क्षमता एक सय जनाभन्दा बढी अट्ने छ। तत्कालीन राजा सहभागी रहेका देशविदेशका महत्त्वपूर्ण कार्यक्रम (इभेन्ट) का भिडिओहरूको रिल पनि सुरक्षित रहेकोले ती भिडिओ पनि सर्वसाधारणले हेर्न पाउने छन् ।
