(दिपेन्द्र थापा क्षेत्री)
सुर्खेत । कर्णाली प्रदेश राजधानी सुर्खेतमा दैनिक ७९ क्विन्टल फलफूल र तरकारी आयात हुने गरेको छ । आयात हुने फलफूल र तरकारी मध्ये लुम्बिनी प्रदेशबाट १३ टन चार क्विन्टल, भारतबाट ५६ टन ६ क्विन्टल र चीनबाट ९ क्विन्टल फलफूल दैनिक आयत हुने गरेको कर्णाली प्रदेश कृषि बजार व्यवस्थापन समिति सुर्खेतले जनाएको छ ।
सबै भन्दा बढी आयात हुने तरकारी मध्ये आलु २० टन र प्याज १५ टन भारतबाट आउने गरेको छ । चीनबाट स्याउ १० टन, भारतबाट केरा २५ टन र बाँकी ९ टन टमाटर, खुर्सानी, भेडे खुर्सानी, मुला, लसुन, काउली र बन्दा दैनिक आयात हुने गरेको कर्णाली प्रदेश कृषि बजार व्यवस्थापन समिति सुर्खेतका अध्यक्ष प्रबल शाहीले बताए ।
नेपाल भौगलिकरुपमा इजरायलभन्दा सात गुणा ठुलो छ । इजरायलको ६० प्रतिशत क्षेत्रफल मरुभूमि छ । पानी कहिलेकाहीँ पर्छ । तर पनि तरकारी र फलफूल उत्पादन गरी २१ मुलुकमा निर्यात गरेर वैदेशिक मुद्रा आर्जन गर्दै आएको छ ।
नेपाल ‘कृषि प्रधान’ मुलुक भनेर चिनिन्छ । त्यसमा कर्णाली प्रदेश भूमि, कृषि तथा सहकारी मन्त्रालयले “अर्ग्यानिक खेतीमा वृद्धि, कर्णालीको संवृद्धि” नाराका साथ करोडौँ बजेट खर्च गरे पनि फलफूल र तरकारीमा लुम्बिनी प्रदेश, चीन र भारतमै परनिर्भरता चुलिएको छ ।
भूमि, कृषि तथा सहकारी मन्त्रालयका सूचना अधिकारी रामभक्त अधिकारी भन्छन् ,‘सक्कली कृषक पहिचान गर्न नसक्दा सञ्चालित प्रमुख कार्यक्रम प्रभावित भएका छन् । अब नयाँ ढङ्गले कार्यक्रम सञ्चालन गरी कर्णालीलाई कृषिमा संवृद्धि बनाउने हामा्रे सङ्कल्प छ ।’
त्यस्तै अध्यक्ष साहीका अनुसार, सरकारको कृषि ऐन, नियम कागजमा राम्रा र अभ्यासमा कमजोरी भएकै कारण कर्णाली मात्र नभएर नेपालै कृषिमा परनिर्भर चुलिँदै गएको छ । कृषिमा उत्पादन गर्न जुन स्थानमा लगानी गर्नु पर्ने हो, त्यो ठाउँमा लगानी पुगेको छैन त्यसैले कृषि नीति नै बेठिक छ ।
