(महेन्द्र सिंह)
बर्दिया । लागुऔषध ब्राउन सुगरसहित चार जनालाई प्रहरीले पक्राउ गरेको छ । पछिल्लो समय लागु औषध सेवन कर्ता र लागु औषधको कारोबार गर्नेलाई प्रहरीले धमाधम पक्राउ गर्न सफल भएको छ । दुई दिनमा चार जनालाई लागु औषधसहित प्रहरीले पक्राउ गर्न सफल भएको बर्दियाका प्रहरी प्रमुख एसपी ईश्वर कार्कीले बताए ।
गुलरिया नगरपालिका–६ निलो पेट्रोल पम्प स्थित सडक बाटोबाट दुईजनालाई प्रहरीले बिहीबार पक्राउ गरेको हो । गुलरिया नगरपालिका–७ बस्ने २२ वर्षिय अर्जुन सुनार र वडा नम्बर ४ बस्ने २१ वर्षिय सन्तोष भट्टराईलाई लागु औषधसहित प्रहरीले नियन्त्रणमा लिएको हो ।
पक्राउ परेका दुवैको साथबाट ९ सय ३० मिलिग्राम लागु औषध ब्राउन सुगर फेला परेको प्रहरीले जारी गरेको प्रेस विज्ञप्तीमा उल्लेख छ ।
दुवै जना सडकमा शंकास्पद रुपमा हिडिरहेको अवस्थामा प्रहरीले नियन्त्रणमा लिई खानतलासी गर्दा लागु औषध फेला परेको हो ।
त्यसैगरी गुलरिया नगरपालिका–८ भादापुल स्थित गुलरियाबाट नेपालगंज तर्फ जादै गरेको अवस्थामा शुक्रबार थप दुई जनालाई प्रहरीले लागु औषध ब्राउन सुगरसहित पक्राउ गरेको हो ।
राजापुर नगरपालिका–१ झबही गाउँ बस्ने ३२ वर्षिय सुनिल शाहले चालाएको सु.प.प्र.०१–००९ प ९६४३ नम्बरको मोटरसाईकल शंकास्पद रुपमा आएकोले प्रहरीले रोकी खानतलासी गर्दा मोटरसाईकलमा पछाडि बसेका गेरुवा गाउँपालिका–५ पशुपतिनगर कटेसपुर बस्ने सुशिल चौधरीको साथबाट ब्राउन सुगर फेला परेको हो ।
चौधरीले पाईन्टमा लुकाई छिपाई राखेको ब्राउन सुगर निकाली झाडीमा फाल्न खोज्दा दायाँ हातको मुठीबाट प्रहरीले फेला पारेको हो । ३ ग्राम ६ सय ७० मिलीग्राम लागु औषध ब्राउन सुगर फेला परेका हो । मोटरसाईकल चालक शाहको खोजीबाट ३५ हजार ५ सय रुपिया र मोटरसाईकलको बिलबुक फेला परेको हो ।
लागु औषध नियन्त्रण ब्यरो शाखा कार्यालय नेपालगंज र जिल्ला प्रहरी कार्यालय बर्दियाबाट खटिएको संयुक्त प्रहरी टोलीले चारै जनालाई पक्राउ गर्न सफल भएको हो । चारै जनालाई पक्राउ गरी आवश्यक अनुसन्धान भईरहेको जिल्ला प्रहरी कार्यालय बर्दियाका प्रहरी प्रमुख एसपी ईश्वर कार्कीले बताए ।
