ABC (क्राईमबिट)
दाङ । राप्ती प्रादेशिक अस्पताल तुलसीपुरका मेडिकल सुपरिटेण्डेन्ट डा. विनोद कुमार सिंहलाई मोसो दलेको अभियोगमा योजनाकार सहित मोसो लगाउने मुख्य व्यक्तिलाई प्रहरीले पक्राउ गरेको छ । पक्राउ पर्नेमा योजनाकार भनिएका सर्जन परियार, लगाउने मुख्य व्यक्ति दिलिप डाँगी र सहयोगी दिवस क्षेत्री रहेको जिल्ला प्रहरी कार्यालय दाङका प्रहरी प्रवक्ता डिएसपी मुकुन्द रिजालले जानकारी दिनुभएको छ ।
जिल्ला प्रहरी कार्यालय दाङले घटना लगत्तै घटनामा संलग्न भएका व्यक्तिहरुलाई खोजविन र पक्राउ गर्न डिएसपी रिजालकै नेतृत्वमा टोली गठन गरेको थियो । प्रहरीले ४ वटा समूह बनाई खोजी गर्ने क्रममा उनिहरुलाई पक्राउ गरेको जनाएको छ ।
पक्राउ परेका सर्जन परियारले आफू प्रहरी समक्ष आफै उपस्थित भएको भनि फेसबुकमा लेखेका थिए । तर प्रहरीले भने परियारलाई घोराहीबाटै पक्राउ गरिएको र उनको फेसबुकमा अरु कसैले प्रहरी समक्ष आफै उपस्थित भएको भनि लेखेको प्रबक्ता रिजालले जानकारी दिए ।
फेसबुमा आफुलाई झुठा मुद्धा लगाएको भन्दै हिरासत भित्र भोक हड्ताल गर्ने उल्लेख गरेका छन् । मोसो दलेको प्रकरणमा ६ जना बिरुद्ध किटानी जाहेरी परेको छ ।
अन्य ३ जनाको खोजी भैरहेको समेत दाङ प्रहरीले जानकारी दिएको छ । पक्राउ परेका बिरुद्ध जिल्ला प्रहरी कार्यालय दाङमा स्वास्थ्यकर्मीहरुको सुरक्षा सम्बन्धी अध्यादेश २०७८ बमोजिम मुद्दा दायर गरिएको छ ।
उनिहरु बिरुद्ध प्रहरीले अनुसन्धान गरेर जिल्ला प्रशासन कार्यालयमा पेश गर्ने छ । स्वास्थ्यकर्मीमाथि हातपात गरेमा पाँच वर्षसम्म कैद सजाय हुने गरी सरकारले नयाँ अध्यादेश ल्याएपछि नेपालमा पहिलोपटक अध्यादेश बमोजिम मुद्दा दायर भएको दाङ प्रबक्ता डिएसपी रिजालले बताए ।
