(महेन्द्र सिंह)
बाँके । जिल्ला प्रहरी बाँकेले वन्युजन्तु ओसार पोसार मुद्दामा फरार रहेका दुई जना फरार प्रतिकादीलाई पक्राउ गरेको छ।
कैद फैसलापछि फरार रहेका राप्तीसोनारी गाउँपालिका ९ का ४४ बर्षीय मनिराम थारु र सोही स्थानका ४३ बर्षीय धनिराम थारुलाई पक्राउ गरिएको जिल्ला प्रहरी बाँकेले जानकारी दिएको छ।
जिल्ला अदालत बाँकेले वन्युजन्तु ओसार पोसार मुद्दामा उनीहरुलाई २०७३ /०३ /१२ गते ११ महिना १० दिन कैद सजाय सुनाएको थियो। त्यस पश्चात् उनिहरु फरार रहदै आएका थिए। जिल्ला प्रहरी बाँकेको टोलीले उनीहरुलाई बिहीवार बाँके बाटै पक्राउ गरि जिल्ला अदालत बाँकेमा बुझाएको बाँके प्रहरीले जानकारी दिएको छ।
अवैध सामाग्री बरामद
त्यस्तै जिल्ला प्रहरी बाँकेले भारतबाट भन्सार छली नेपालगन्ज ल्याइएका अवैध सामाग्रीहरु बरामद गरेको छ।
जिल्ला प्रहरी बाँकेबाट गएको टोलीले नेपालगन्ज १७ परसपुरबाट बिहिवार साढे १ लाख ५२ हजार ९७५ रुपैयाँ बराबरका भारतबाट भन्सार छली चोरी पैठारी गरी ल्याइएका लत्ताकपडा, चिनी, पास्ता, गाडीका सामान लगायतका विभिन्न सामानहरू समाग्री बरामद गरेको हो।
बरामद गरिएका सबै अवैध सामग्रीलाई आवश्यक कारवाहीको लागि नेपालगन्ज भन्सार कार्यालय बुझाइएको जिल्ला प्रहरी बाँकेका प्रहरी प्रबक्ता डिएसपी मधुसूदन न्योपानेले जानकारी दिएका छन।
