(महेन्द्र सिंह)
बाँके । जमुनाह नाकामा भारतीय सवारीमा लगाइएको रोक भोलि सोमबारदेखि पूर्ण रुपमा हट्ने भएको छ । बाँकेका प्रमुख जिल्ला अधिकारी शिवराम गेलालले आजैदेखि नाका खोल्ने तयारी भएपनि भन्सार कार्यालयले केही कागजी प्रक्रिया मिलाउनु पर्ने भएकाले भोलि सोमबारदेखि नाकामा लगाइको रोक पूर्णरुपमा हट्ने बताए।
यद्यपी नेपाली नम्रब प्लेटका मोटरसाइकल, अटो रिक्सा, साइकलहरु भने आजैदेखि रुपैँडिया जान र आउन भने सुचारु भइसकेको छ । कोरोना प्रभावपछि भारतीय सवारी नेपाल प्रवेश र नेपाली सवारी भारत प्रवेशमा रोक लगाउँदै आइएको थियो । विगतमा खाद्यान्न लगायतका सामग्री बोक्ने सवारी साधन निर्वाध रुपमा सञ्चालन भएपनि निजी गाडी नेपाल प्रवेशमा भने रोक लगाइएको थियो ।
यस्तै भारतले पनि नेपाली निजी सवारी सन्चालनमा रोक लगाउँदै आएको थियो । यसअघि नाकामा पैदलयात्रुलाई आउजाउ गर्न मात्र दिइएको थियो । भारतीय सुरक्षा बल एसएसवीले पनि नाकामा सवारी साधन चल्न दिने भनेर माथिल्लो तहबाट निर्देशन आइसकेको जानकारी दिएको बाँकेका प्रहरी प्रवक्ता मधुसुदन न्यौपानेले जानकारी दिए।
गत ११ गते बसेको संघीय मन्त्री परिषद्को बैठकले विभिन्न मापदण्ड पुरा गरेर भारतीय नीजि सवारीलाई नेपाल प्रवेश गर्न दिने निर्णय गरेको थियो । सोही निर्णय अनुसार जमुनाह नाका भएर पनि सवारी साधन संचालनको अनुमति दिने निर्णय भएको प्रमुख जिल्ला अधिकारी गेलालले बताए ।
