(ABC-Sanchar)
झापा । स्रोत नखुलेको आठ लाखभन्दा बढी रूपैयाँसहित झापा, बिर्तामोड–३ का ३४ वर्षीय उमेश साहलाई प्रहरीले पक्राउ गरेको छ । इलाका प्रहरी कार्यालय रानीले विराटनगर–१८ भेडियारीबाट साहलाई स्रोत नखुलेको ८ लाख २० हजार रुपैयाँसहित बिहीबार पक्राउ गरेको हो ।
मोरङ प्रहरीका प्रवक्ता दिपक श्रेष्ठका अनुसार साहलाई उक्त पैसा लिएर भारततर्फबाट विराटनगरतर्फ आउने क्रममा पक्राउ गरिएको हो । को२९प ८६४० नम्बरको स्कुटरमा सवार साहले बोकेको रकमको स्रोत नखुलेपछि उनलाई नियन्त्रणमा लिइएको प्रवक्ता श्रेष्ठले जानकारी दिए ।
नेपाली नगद १ हजारको ३३५ थान, ५ सयको ६४० थान, १ सयको १,६०० थान र ५० को १०६ थान नोट बरामद भएको प्रहरीको भनाइ । पक्राउ परेका साहलाई थप कारवाहीका लागि इटहरीस्थित राजश्व अनुसन्धान कार्यालय सुनसरी बुझाइएको प्रवक्ता श्रेष्ठले जनाए ।
