(Abc sanchar)
बाँके । तिहार नजिकिँदै गर्दा जुवाडेविरुद्ध बाँके प्रहरीले धावा बोलिसकेको अवस्थामा जुवाडेहरुलाई धमाधम पक्राउ गर्न सुरु गरिसकेको छ । गत हप्ता कोहलपुरबाट ठूलो रकमसहित आधा दर्जन जुवाडेलाई पक्राउ गर्न सफल भएको बाँके प्रहरीले पुनः खजुरामा जुवा खेलिरहेका जुवाडे पक्राउ गरेको छ ।
इलाका प्रहरी कार्यालय धनौलीबाट गएको टोलीले गएराती ९ बजे खजुरा गाउँपालिका २ ‘ए’ गाउँ नजिक नर्सरीमा जुवा खेलिरहेका दुई जनालाई ६० हजार ५०० नगदसहित पक्राउ गरेको छ ।
जानकी गाउँपालिका ३ का २८ बर्षीय अशोक बर्मा र रुपइडिहा बस्ने ४० बर्षीय राधे बर्मालाई पक्राउ गरेको जिल्ला प्रहरी बाँकेले जानकारी दिएको छ । उनीहरुको साथबाट १८ गड्डी तास समेत फेला परेको हुँदा अरु जुवाडे फरार भएको हुन सक्ने बाँके प्रहरीले जानकारी दिएको छ । पक्राउ परेका दुबै जनासँँग थप अनुसन्धान भइरहेको प्रहरीले जानकारी दिएको छ ।
