ABC (क्राईमबिट)
नवलपरासी । सुस्तामा भारतीय सिमा सुरक्षा बल एस.एस्.वि. अनाधिकृत रुपमा प्रवेश गरेको विषयमा पश्चिम नवलपरासीका प्रमुख जिल्ला अधिकारी धर्मेन्द्र कुमार मिश्रले भारतको ध्यानआर्कषण गराउनुभएको छ ।
भरतीय समकक्षी पश्चिम चम्पारनका डिस्ट्रिक म्याजिस्ट्रेट (जिल्लाधिकारी) कुन्दन कुमारसँग टेलिफोनमा संवाद गरेको मिश्रले रेडियो परासीलाई जानकारी दिनुभयो । सुस्ताको स्थलगत निरिक्षण पछि फर्किएर मंगलबार अबेर मिश्रले कुन्दन कुमारसँग टेलिफोन संवाद गर्दै आनाधिकृत नेपाल प्रवेशको विषयमा जिज्ञासा राख्नुभएको थियो ।
भारतीय सिमा सुरक्षा बल नेपाली क्षेत्रमा बिना जानकारी हतियार सहित आएको पाईयो यस्ले दुई देशकै सम्बन्धमै असर पुर्याउने भएकाले यस विषयमा ध्यानआर्कषण गराएको उहाँले बताउनुभयो । जवाफमा कुन्दन कुमारले आफुले यस विषयलाई गम्भिर रुपमा लिएको र तत्कालै जानकारी लिने त्यस्तो कार्य हुन नदिने बताएको प्रमुख जिल्ला अधिकारी मिश्रले बताउनुभयो ।
आईतबार दिउसो भारतीय सिमा सुरक्षा बल एस.एस.वि.हतियार सहित नेपाली भुमिमा प्रवेश गरी नापजाँच गरेको थियो । नारायणी पारीको सुस्ताको भारतले विवादित भनेर जोतभोग गर्न नदिएको क्षेत्रमा एस.एस.वि.प्रवेश गरेको हो । त्यस लगत्तै सुस्ता गाँउपालिका अध्यक्ष रामप्रसाद पाण्डे सहित, प्रमुख जिल्ला अधिकारी मिश्र, प्रहरी उपरिक्षक मनोज कुमार यादव, शसस्त्र प्रहरी उपरिक्षक महेश अधिकारी सहितको टोली सुस्ता पुगेर स्थलगत निरिक्षण गरेको थियो ।
टोलीले सुस्तामा ड्रोन उडाएको पुष्टि हुन नसकेको बताउँदै भारतिय सुरक्षाकर्मी अनाधिकृत रुपमा प्रवेश गरेको बताएको छ । यस विषयमा माथिल्लो निकायमा जानकारी गराईएको प्रमुख जिल्ला अधिकारी मिश्रले बताउनुभयो ।
भारतले विवादित भनिएको भुमि आफ्नो पक्षमा पार्न पटक–पटक नापजाँच गर्दै आएको अनुभुति भएको सुस्ता बचाउ अभियानका प्रवक्ता रविन्द्र जयसवालले बताउनुभयो । लालपुर्जा सहितको भुमि विवादित भनेर उपयोग गर्न नदिनु दुखद भएको बताउँदै सरकार यस विषयमा गम्भिर बन्न नसकेको सुस्ता गाँउपालिका अध्यक्ष रामप्रसाद पाण्डेले गुनासो गर्नुभयो । भारतले विवादित भनेर जोतभोग गर्न नदिएको जमिनमा नेपालीको लालपूर्जा रहेको अध्यक्ष पाण्डेले बताउनुभयो ।
