ABC (क्राईमबिट)
काठमाडौं । अवकाशपछि राजनीतिमा लाग्ने तयारीमा जुटेका पूर्व प्रहरी महानिरीक्षक सर्वेन्द्र खनाललाई मुख्यतय दुई वटा तनाव झेलिरहेका थिए । एउटा उनीविरुद्ध अख्तियार दुरुपयोग अनुसन्धान आयोगले छानबिन गरिरहेको थियो भने, अर्काेतर्फ सर्लाही इन्काउन्टर घटनामा उनी पनि मुछिएका थिए ।
दुई वटा तनावमध्ये खनालले एउटा तनाव भने हल गरेका छन् । निकै दौडधुपपछि आफूविरुद्धको भ्रष्टाचार छानबिन उनले तामेलीमा राख्न सफल भएका छन् । गत असार १३ गते उनीविरुद्धको छानबिन तामेलीमा राख्ने निर्णय भएको छ । अख्तियारका प्रमुख आयुक्त प्रेम कुमार राई लगायतसँग हारगुहार गरेर उनले मुद्दा तामेलीमा राख्न सफल भएको स्रोत बताउँछ ।
महानिरीक्षक हुँदा प्रहरीका खरिदमा व्यापक अनियमितता भएको थियो । त्यसमध्ये पनि ३० वटा स्कर्टिङसम्बन्धि मोटरसाइकल खरिदमा प्रष्ट कानून मिचेको पाइएपछि खनाल संकटमा परेका थिए । ३० वटा मोटरसाइकल खरिदमा मात्र करिब डेढ करोड कमिसनको खेल भएको थियो । छानबिनमा गम्भीर देखिएपछि मुद्दा नै चलाउनुपर्ने निष्कर्ष अख्तियारका अनुसन्धान अधिकृतको थियो । खनाल महानिरीक्षक हुँदा गृहसचिव रहेका प्रेम कुमार राई अख्तियार पुगेपछि खनाललाई राहत भएको हो ।
तर, इन्कान्टर घटनामा भने उनलाई अझै समस्या छ । खनालकै निर्देशनमा सर्लाहीका कुमार पौडेललाई प्रहरीले गोली हानेको थियो । सो घटना इन्कान्टर भनिएपछि पक्राउ गरेर गोली हानिएको मानव अधिकार आयोगले ठहर गरेको थियो । जसमा खनालसहितका प्रहरीमाथि मुद्दा चलाउन भनिएको छ । सर्वाेच्च अदालतको आदेशमा हालै जाहेरी समेत दर्ता भइसकेको छ । जसकारण जुनसुकै बेला समस्यामा पर्न सक्ने भएकाले खनाल राजनीतिमा लाग्ने तयारीमा छन् ।
अवकाश पाएलगत्तै महेश बस्नेत समूहसँग मिलेर राजनीतिक नियुक्ति खाने योजना बनाएमा उल्टो अपहरण प्रकरणमा मुछिएपछि उनी ज्ञानेन्द्र शाहीको समूहसँग नजिकिएका थिए । पछिल्लो समय फेरि एमालेमै प्रवेशको योजना बनाएका छन् । तर, अझै कुरा नमिलेको स्रोत बताउँछ ।
