(ABC-Sanchar)
बाँके । बर्दिया राष्ट्रिय निकुञ्ज बाघ देख्ने पर्यटकको लागि रोजाईमा परेको छ । प्रत्येक दिन बाघ भेटिदा पर्यटकहरुको रोजाईमा बर्दिया राष्ट्रिय निकुञ्ज परेको हो । देश विदेशबाट आएका पर्यटकले निकुञ्जमा बाघ देख्ने गरेका छन् । पर्यटकले निकुञ्जको जंगल सफारी गर्ने क्रममा बाघ देख्न पाउँदा आफुले गरेको सफारी सफल भएको महसुस गर्छन् । अघिल्लो साता बर्दिया राष्ट्रिय निकुञ्जको सफारी गरेर फर्किदै गरेका आन्तरिक तथा बाह्य पर्यटकले बाघ देखेको अनुभव साँटे । 
सफारीमा संलग्न रहेका आन्तरिक पर्यकट प्रधानले फरकसमाचारसंग बाघ देखेको खुसी व्यक्त गरे । ‘चित्तल कराउदै थिए, घुर घुर आवाज आयो’ प्रधानले भने, ‘अलि अगाडि माथि पट्टी बाघ बसेको देखे ।’ बाघ त्यस एरियामा रहेकोले चित्तल कराएको प्रधानलाई विश्वास भयो । चित्तलको शिकार गर्ने उदेश्यले मौका छोपेर बाघ अलि माथि बसेको हुन सक्ने उनले अनुमान गरे ।
हात्तीमा बसेका प्रधानले बाघको भिडियोसमेत बनाउँन भ्याए । उनी अत्यन्तै खुसी भएको महसुस गरे । टिभिको प्रर्दामा त बाघ जो सुकैले देख्छन् तर, बर्दिया राष्ट्रिय निकुञ्जको जंगल सफारी गरेका पर्यटकले प्रत्यक्ष बाघ देखेको अनुभव साँट्छन् । 
त्यसै गरी फ्रान्स र युकेबाट आएका पँहुनाले बाघ र गैंडा देखेको अनुभव साँटे । निकुञ्ज सफारीको क्रममा बाघ देखेर फर्किदै गरेका पर्यटकहरुको अनुहारमा खुसीको चमक देखिएको थियो । सफारी गरेर फर्किदै गरेका पँहुनाहरु निकुञ्ज गेटको छेउमा भेटिदा निकै खुसी देखिएका थिए । पँहुनाहरुलाई घुमार फर्किदै गरेका नेचर गाईड बिर बहादुर शाहीले बाघ देखेर पर्यटकहरु अत्यन्तै खुसी भएको बताए । निकुञ्ज सफारी गर्ने क्रममा प्रत्येक दिन बाघ देखिएको नेचर गाईड शाहीले सुनाए ।
‘पर्यटकले निकुञ्जको सफरी गर्दा बाघ देख्न ईच्छुक हुन्छन्’ नेचर गाईड शाहीले भने,‘पर्यटकको जुन ईच्छा प्रत्येक दिन पुरा हुने गरेको छ ।’ निकुञ्जका कर्मचारीका अनुसार बाघको संख्या बृद्धि भएको छ । जसले गर्दा निकुञ्जको सफारी गर्न पर्यटकलाई लैजादा प्रत्येक दिन बाघ भेटिने गरेको नेचर गाईड शाहीले जानकारी दिए ।
निकुञ्ज सफारी गर्ने पँहुनाहरुको लागि असोज देखि निकुञ्ज खुल्ला गरिएको बर्दिया राष्ट्रिय निकुञ्जका प्रमुख संरक्षण अधिकृत बिष्णु प्रसाद श्रेष्ठले बताए । निकुञ्जमा प्रत्येक दिन बाघ देखिने भएकोले पर्यटकको संख्या उत्साह जनक रहेका बताए । निकुञ्ज सफारी गरेर बन्यजन्तु तथा बाघ देखेर आएका पर्यटकले अनुभव सेयर गर्दा सफारी सन्तोष जनक बुझिएको उनले सुनाए । कोभिड–१९ महामारी पछि निकुञ्जको जंगल सफारी असोज महिना देखि संचालन भएको हो ।
असोज महिनामा निकुञ्ज सफारी गरेका पर्यटकको संख्या ९ सय रहेको छ । कात्तिकमा पर्यटकको संख्या बढेर २ हजार ६ सय पुगेको निकुञ्जको रेकर्डमा उल्लेख छ । मंसिर महिनाको संख्या माहिनाको अन्तिममा थाहा हुनेछ । तर, प्रत्यके दिन १ सय जना पर्यटक प्रतिदिन निकुञ्जमा घुमेको रेकर्डले देखाएको प्रमुख संरक्षण अधिकृत श्रेष्ठले जानकारी दिए ।
बर्दिया राष्ट्रिय निकुञ्जमा बाघ गणना बुधबार देखि बर्दिया र बाँके राष्ट्रिय निकुञ्जमा सुरु हुदैछ । बाघ गणनामा ७ सय २२ ग्रिडमा क्यामरा जडान गरिनेछ । बाघ गणनाको अवधि करिब तीन महिनासम्म चल्ने निकुञ्जले जनाएको छ ।
