(तेज वली)
दाङ । तुलसीपुर उपमहानगरपालिका वडा नं. १८ बेलझुण्डीस्थित योगी आदित्यनाथ फाउन्डेसन केन्द्रमा राखिएका दर्जन बढी गाईहरु एकै दिन मरेका छन् ।
शुक्रबार १४ गाई र शनिबार थप एउटा गाई गरि दुई दिनको अबधिमा १५ वटा गाई मरेको पाइएको प्रमुख जिल्ला अधिकारी हिरालाल रेग्मीले जानकारी दिए ।
प्रजिअ रेग्मीसहितका अधिकारीहरु गाई मरेको खवरपछि आइतबार संरक्षण केन्द्रमा स्थलगत अनुगमन गर्न गएका छन् ।
त्यस्तै पशु सेवा कार्यालय घोराही र तुलसीपुरका पशु प्राबिधिकहरु आएर मरेका गाईहरुको पोष्टमार्टम गर्ने कार्य चलिरहेको छ ।
संरक्षण केन्द्रका अध्यक्ष अनिल बिष्टले लगातार दूई दिन सम्म परेको असिना पानीका कारण चिसोले गर्दा गाईहरु मरेको हुन सक्ने बताए ।
तर, स्थानीय एक जना ब्यक्तिले भने संरक्षण केन्द्रका नाममा गाईहरु जथाभावी ल्याएर हुल्ने, खाने कुरापनि नदिने, घाम पानी बाट जोगाउने उचित प्रबन्ध पनि नगरिएको हुँदा गाईहरु मरेको भन्दै आलोचना गरे ।
अध्यक्ष विष्टले घाँस परालको अभाव भएको स्वीकार गरे । गाई संरक्षण केन्द्रलाई तुलसीपुर उपमहानगरपालिका र घोराही उपमहानगरपालिकाले जनही पाँच÷पाँच लाख गरि दश लाख आर्थिक साहेता गरेका छन् ।
यो गाई संरक्षण केन्द्र भदौ १४ गते कृष्ण जन्माअष्टमीको दिन उद्घाटन गरिएको हो । छाडा चौपाया संरक्षण गर्ने उदेश्यले केन्द्र स्थापना गरिएको हो । नेपाल संस्कृत बिश्वविद्यालयको ४५ बिगाहा जग्गा बार्षिक ९ लाख ६३ हजार दिने सर्तमा तीन बर्षका लागि जग्गा भाडामा लिइएको छ । अध्यक्ष बिष्टका अनुसार त्यसमा बार्षिक दश प्रतिसत बृद्ध सर्त छ ।
त्यही खुल्ला चौरमा ४० मिटर लम्बाई र २४ मिटर चौडाईको ट्रष्ट निर्माण गरिएको छ । वरिपरी खुल्ला ठाउँमा माथिबाट जस्ता पाता लगाइएको अध्यक्ष बिष्टले जानकारी दिए ।
अध्यक्ष बिष्ट आँफैले उक्त ट्रष्टमा दुई सय जति गाई मात्रै अट्न सक्ने क्षमता रहेको बताए । जहाँ अहिले साढे तीन सय जति गाईहरु राखिएका छन् ।
