ABC (क्राईमबिट)
काठमाडौं । प्रहरी प्रधान कार्यालयले चितवन,महोत्तरी र बर्दियाका प्रहरी प्रमुखको काज सरुवा गरेको छ । प्रहरी प्रधान कार्यालय स्रोतका अनुसार चितवनमा प्रहरी उपरीक्षक (एसपी) नवराज अधिकारी, महोत्तरीमा कृष्ण पंगेनी र बर्दियामा बिरेन्द्र शाहीको काज सरुवा भएको हो ।
यी तीनै जिल्लामा रहेका एसपीत्रय ओम अधिकारी, दिनेश आचार्य र ईश्वर कार्कीको एकवर्षे कार्यकाल पुरा भएपनि सरुवा भएको थिएन् ।
बाग्मती प्रदेश कार्यालयमा रहेका अधिकारीलाई चितवन, काठमाडौं उपत्यका अपराध अनुसन्धान कार्यालयमा रहेका पंगेनीलाई महोत्तरी र अख्तियार दुरुपयोग अनुसन्धान आयोगमा रहेका बिरेन्द्र शाहीलाई बर्दियामा काज सरुवा गरिएको हो ।
चितवनमा रहेका एसपी ओमप्रसाद अधिकारी अख्तियार, महोत्तरीमा रहेका दिनेश आचार्य अपराध महाशाखा र बर्दियामा रहेका ईश्वर कार्कीको प्रहरी प्रधान कार्यालय कार्य विभागमा काज सरुवा भएको छ ।
प्रहरी प्रधान कार्यालयले कपिलवस्तु प्रहरी प्रमुखकाे नेतृत्वगर्दा आफ्नो कार्यकालमा अपराध नियन्त्रण, तस्करी तथा चोरी पैठारी रोकथाम, राजस्व चुहावट नियन्त्रण, फरार अभियुक्त पक्राउ र अपराध अनुसन्धानमा अब्बल नतिजा दिएका अधिकारीलाई चुनौतीपूर्ण मानिएको चितवनको जिम्मेबारी दिएको छ ।
यस्तै महानगरीय अपराध महाशाखामा रहेका एसपी पंगेनीलाई नेपाल भारत सीमा अपराधको थलो मानिने महोत्तरी र बढुवापछि नेतृत्वको अवसर नपाएका शाहीलाई बर्दियाको जिम्मेबारी दिएको हो ।
