ABC (क्राईमबिट)
काठमाडौँ । अवैध हुन्डी कारोबारमा संलग्न दुई जनालाई काठमाडौँ प्रहरीले पक्राउ गरेको छ। काठमाडौँ महानगरपालिका -१३ ताहचल मख्खनमा बिमला इन्टरनेशनल प्रालि नामको संस्था सञ्चालन गरी हुन्डी कारोबार गर्ने बिक्की खड्गी र भारतीय नागरिक अमितकुमार अग्रवाललाई प्रहरीले पक्राउ गरेको हो।
उनीहरूले राजस्व छली गैरकानुनी रुपमा हुन्डफमार्फत वित्तीय कारबार गर्दै आइरहेको भन्ने सूचनाका आधारमा अनुसन्धान गर्दा उनीहरू पक्राउ परेका हुन्। प्रहरीले अग्रवाल बस्ने घरको गेट अगाडिबाट आइतबार खड्कीलाई पक्राउ गरेको थियो। उनकै बयानका आधारमा अन्य अपराधबारे खुल्न आएको प्रहरीले जनाएको छ। अग्रवाल नेपालमा नक्कली गरगहनाको होलसेल कारोबारीसमेत हुन्।
खड्कीले प्रहरीसँगको बयानमा कालीमाटीस्थित जीवनदृष्टि बहुउद्देश्यीय सहकारीबाट ५० लाख रुपैयाँ लिई अग्रवालको कोठामा पुर्याइदिएको बताएपछि प्रहरीले अग्रवालको कोठा खानतलासी गरेको थियो। कोठा खानतलासी गर्दा एक करोड ५० लाख रुपैयाँ फेला परेको प्रहरीले जनाएको छ। उनीहरूलाई थप अनुसन्धानको लागि राजश्व अनुसन्धान विभाग, हरिहरभवन, ललितपुर पठाइएकाे छ।