ABC (Sanchar) काठमाडौँ- निर्वाचन आयोगले ७४७ वटा स्थानीय तहको मतपत्र वैशाख १८ गतेसम्म छापिसक्ने भएको छ । बाँकी ६ वटा महानगरपालिकाको मतपत्र २२ गतेसम्म छापिसक्ने आयोगको तयारी छ ।
आगामी वैशाख ३० गते हुने स्थानीय निर्वाचनका लागि आयोगले मतपत्र छाप्न सुरु गरिसकेको छ । भक्तपुरस्थित जनक शिक्षा सामग्रीले देशभर एकसाथ हुने निर्वाचनका लागि मतपत्र छपाइको काम गरिरहेको आयोगले जनाएको छ ।
विभिन्न राजनीतिक दलले आफ्ना उम्मेदवार मनोनयन गर्नुअघि जिल्ला-जिल्लामा मतपत्र पठाइसक्ने आयोगका सहायक प्रवक्ता सुर्यप्रसाद अर्यालले जानकारी दिए ।
उनका अनुसार मुख्य-मुख्य राजनीतिक दलको चिन्ह समेटेर बनाइएको मतपत्र सुरुमा जिल्लाका ठूला स्थानीय तहमा बाहेक अरू ठाउँमा पठाइन्छ । निर्वाचनमा बढी मतदाता हुने स्थानीय तहमा केही दिन मात्र मतपत्र छपाइमा ढिलो हुन्छ ।
मतपत्रलाई रुजु गर्नुपर्ने भएकाले निर्वाचन हुनु दुई साताअघि मतपत्र पठाइसक्नुपर्ने अर्यालले जानकारी दिए ।
‘छ वटा महानगर मध्ये अझ सबैभन्दा बढी ढिलो छपाइ काठमाडौँ महानगरपालिकाको हुन्छ,’ उनले भने, ‘जुन स्थानीय तहमा बढी मतदाता हुन्छन् त्यसमा ढिलाइ हुन्छन् । उम्मेदवारको संख्या अनुसार पनि दलको चिन्ह तय गर्नुपर्ने हुन्छ ।’
मतपत्रको साइज अनुसार मूल्य फरक-फरक पर्ने उनले जानकारी दिए । सबैभन्दा बढी उम्मेदवार बढी हुने स्थानीय तहको मतपत्र बनाउँदा बढी खर्च हुने उनको भनाइ छ ।
आयोगका अनुसार कम मतदाता भएका स्थानीय तहको मतपत्र छिटो बनाएर सकिन्छ । डोल्पाको मतपत्रको मूल्य सबैभन्दा सस्तो पर्नेछ । ‘मतदाता कम भएको ठाउँमा मतपत्र छपाइ कम र चुनाव चिन्ह पनि थोरै हुने भएकाले मूल्य सस्तो पर्छ’, उनले भने ।
आयोगले १६ गतेबाट नमूना मतपत्र छाप्न सुरु गरिसकेको छ । सबै जिल्ला निर्वाचन कार्यालयमा नमूना मतदान कार्यक्रम हुनेछ । जनक शिक्षा सामग्रीले आयोगसँग सम्झौता गरेर छपाइ प्रक्रिया अगाडि बढाएको हो । आयोगका अनुसार एकै किसिमका मतपत्र बनाउनु परेमा मूल्य सस्तो पर्न जानेछ ।
मतपत्रको आकार र शैलीमा पनि मतपत्रको मूल्य निर्धारण हुनेछ ।
आयोगले २ करोड मतपत्र छाप्ने छ । मतपत्र छपाइको स्थान नेपाली सेनाको नियन्त्रणमा रहेको छ । उनका अनुसार, मतपत्र कति छपाइ भयो त्यसको सम्पूर्ण जानकारी आयोग र नेपाली सेनाले जानकारी दिनेछन् ।
उनका अनुसार, मतपत्र छपाइस्थल वरिपरि सिसिटिभी क्यामेरा पनि जडान छन् । मतपत्र छपाइस्थल सिसि क्यामेराको निगरानीमा र सबै सुरक्षाकर्मीको नियन्त्रणमा छन् । रासस
