ABC-SANCHAR
पर्सा । पछिल्लो समय बढ्दै गएको गर्मीलाई मध्यनजर गर्दै पर्सा जिल्लाका विभिन्न स्थानीय तहले गर्मी विदा दिन थालेका छन् ।
असार महिनाको अन्त्यसम्म पनि वर्षा नहुँदा बढ्दै गरेको गर्मीका कारण विद्यालयमा पठनपाठन अहसज हुँदै गएपछि जिल्लाको सदरमुकाम वीरगञ्ज महानगरपालिका, पोखरिया नगरपालिका, पाकाहमैनपुर गाउँपालिका, धोविनी गाउँपालिका र विन्दवासिनी गाउँपालिकाले गर्मी विदा घोषणा गरेका हुन् ।
वीरगञ्ज महानगरपालिकाले गत बुधबारदेखि आज शुक्रबारसम्म विद्यालय बन्द गरेको छ भने पोखरिया नगरपालिकाले साउन १ देखि २८ गतेसम्मका लागि विदा दिएको छ ।
त्यसैगरी पाकाहमैनपुर गाउँपालिकाले पनि बिहिबार एउटा सूचना जारी गर्दै साउन १ गतेदेखि २८ गतेसम्म विदा घोषणा गरेको छ । बिहिबार गाउँपालिकाको एउटा विद्यालयमा केही विद्यार्थी गर्मीका कारण बेहोस भएपछि पालिकाले विदा दिएको थियो ।
यस्तै धोविनी गाउँपालिकाले पनि साउन २८ गतेसम्म पालिकाका सम्पूर्ण शैक्षिक संस्थामा विदा घोषणा गरेको गाउँपालिका अध्यक्ष मदन चौहानले जानकारी दिए ।
विन्दवासिनी गाउँपालिकाले आज शुक्रबार एउटा सूचना जारी गर्दै ३० दिनका लागि विद्यालय बन्द रहने जनाएको छ । गर्मी बढेसँगै सामुदायिक विद्यालयहरूमा पठनपाठन प्रभावित हुँदा र विद्यार्थीको सङ्ख्या पनि कम हुँदै गएपछि विदा घोषणा गरिएको गाउँपालिकाका प्रमुख प्रशासकीय अधिकृत राजु साहले बताए ।
