(ABC-Sanchar)
काठमाडौं । भारतको नयाँ दिल्ली निकट रहेको नोयडाको सेक्टर ‘९३ए’मा रहेको बहुचर्चित ट्वीन टावरलाई भत्काउने सबै तयारी पुरा गरिएको छ । आइतबार दिउँसो यी विवादास्पद टावरहरू मात्र १२ सेकेन्डमा ध्वस्त हुनेछन् ।
समाचार एजेन्सी एएनआईका अनुसार रियल इस्टेट कम्पनी सुपुरटेकको दुई टावरलाई भत्काउन अघि कयौँ क्रेनहरू पुगेका छन् । प्रहरीले सो क्षेत्रलाई खाली गराइरहेको छ । त्यस्तै कयौँ एनजीओहरु सो क्षेत्रको कुकुरहरूलाई त्यहाँबाट निकाल्न जुटेको छ ।
एपेक्स र केएन नामक यी टावरहरूलाई सुपरटेक बिल्डरले निर्माण गरेको थियो । ३० तल्लाहरू रहेका यी टावरहरूलाई ट्वीन टावर भनिन्थ्यो । यसको उचाइ ३२० फिटभन्दा बढी रहेको छ । यो भारतमा भत्काउन लागिएको सबैभन्दा ठुलो भवन हो । यसलाई भत्काउन ३ हजार ७ सय किलोग्राम विस्फोटक पदार्थ प्रयोग गरिने बताइएको छ । एजेन्सी
