(ABC-Sanchar) कञ्चनपुर । घाँस काट्न गएकी एक जना महिलालाई बाघले आक्रमण गरेको छ । जिल्लाको बेलौरी नगरपालिका-८ पचुईमा स्थानीय ४२ वर्षीया गंगा चन्दलाई बाघले आक्रमण गरेको जिल्ला प्रहरी कार्यालयले जनाएको छ ।
जिल्ला प्रहरी कार्यालय कञ्चनपुरका डिएसपी प्रकाश डाँगीका अनुसार घर छेउकै खप्टी नालामा घाँस काटिरहेकी चन्दलाई बाघले आक्रमण गरेर लगेको छ । उनको खोजी कार्य भइरहेको डिएसपी डाँगीले बताए । नाला किनारमा सिमसार जमिन र झाडी भएका कारण खोजीमा समस्या भइरहेको छ ।
उक्त क्षेत्रमा चैत मध्यदेखि दिउँसै बाघ देखिइरहेको थियो । चैत तेस्रो साता भारतको दुधुवा राष्ट्रिय निकुञ्जमा बाघको आक्रमणमा परि पुनर्वास नगरपालिका-१० की एक महिलाको मृत्यु भएको थियो ।
