ABC (क्राईमबिट) काठमाडौँ । जीर्ण तथा हराएका भारततर्फका अन्तर्राष्ट्रिय सीमास्तम्भ निर्माण, मर्मत र रंगरोगन गर्न सरकारले छुट्टै कार्यविधि ल्याउने भएको छ । गृह मन्त्रालयले सशस्त्र प्रहरी बल एपीएफलाई ‘सीमा स्तम्भको मर्मतसम्भार र पुन:स्थापनासम्बन्धी कार्यविधि’को मस्यौदा निर्माणको जिम्मा दिएको हो । सीमा सुरक्षा सशस्त्र प्रहरीले गर्दै आएको छ ।हराएका सीमास्तम्भको खोजबिन तथा जीर्ण अवस्थाका संरचनाको मर्मतसम्भार नहुँदा भारतीय पक्ष नेपाली भूमिमा प्रवेश गरी अनधिकृत संरचना बनाउने र सीमा क्षेत्रका नेपालीमाथि दुर्व्यवहार गर्ने घटना बर्सेनि दोहोरिने गरेका छन् ।
सिमानामा भारतीय ज्यादतीका घटना बढेपछि ३ वर्षअघि नै सरकारले परराष्ट्र मन्त्रालयका तत्कालीन सहसचिव यज्ञबहादुर हमालको नेतृत्वमा गृह र रक्षा मन्त्रालय तथा नापी विभागका अधिकारीसहितको सीमा निरीक्षण समिति बनाएर समस्या पहिचान एवं समाधानका उपाय पेस गर्न निर्देशन दिएको थियो ।
समितिले नेपाली पक्षले सुरक्षा तथा त्यसको संरक्षण गर्नुपर्ने अवस्थाका स्तम्भको रंगरोगन, जीर्ण अवस्थाका संरचनाको मर्मत र हराएकाको खोजबिन गर्न सशस्त्र प्रहरीलाई जिम्मा दिन सुझाव दिएको थियो । २०७७ साउन १९ को मन्त्रिपरिषद् बैठकले त्यही प्रतिवेदनका विषय ग्रहण गर्दै सुझाव कार्यान्वयन गर्ने निर्णय गरेको थियो । तर, मन्त्रिपरिषद्को उक्त निर्णय कार्यान्वयनमा गएको थिएन ।
