(ABC-Sanchar)
दाङ । नेपाल पत्रकार महासंघको केन्द्रीय समितिले निर्धारण गरेको ‘पत्रकार महासंघको सदस्यता शुद्धिकरण मापदण्ड-२०७९’ दाङमा पूर्ण रुपमा कार्यान्वयनमा आएको छ । पत्रकार महासंघ दाङ शाखाका अध्यक्ष दुर्गालाल केसीको अध्यक्षतामा बिहीबार बसेको बैठकले सदस्यता शुद्धिकरण मापदण्ड-२०७९’ दाङमा पूर्ण रुपमा कार्यान्वयनमा ल्याएको हो ।
बैठकले दाङ शाखाको सदस्यता शुद्धिकरणका लागि सिफारिस गर्न गठित समितिले पेश गरेको प्रतिवेदन पनि पारित गरेको छ । शाखा उपाध्यक्ष सन्तोष सुवेदीको संयोजकत्वमा सहसचिव दशरथ घिमिरे र सदस्य उदय बिसी सदस्य रहेको समितिले पेश गरेको प्रतिवेदन अनुसार नविकरण गर्न मिल्ने र नमिल्ने सदस्यहरुको टुंगो लगाएको छ ।
महासंघ दाङ शाखामा रहेका २ सय ७५ सदस्यमध्ये मापदण्ड अनुसार हाल ८५ जना सदस्यको मात्रै नविकरण गर्ने निर्णय गरिएको छ । पत्रकारितामा क्रियाशिल नरहेका, स्वेच्छिक त्याग गरेका र मापदण्ड अनुसार नविकरण गर्न नमिल्ने अवस्थाका ११८ जना सदस्यहरुको नविकरण नगर्ने निर्णय भएको छ ।
त्यस्तै सदस्यता शुद्धिकरण सिफारिश समितिले पत्रकारितामा क्रियाशिल रहेका तर मापदण्ड अनुसार नविकरण गर्न नमिल्ने अवस्थाका ८१ जना सदस्यका सम्बन्धमा थप छलफल गर्न आवश्यक देखिएकाले महासंघको प्रदेश र केन्द्रीय समितिमा पठाउन समितिले सुझाव दिएका कारण उक्त सुझावलाई सोही अनुसार पठाउने निर्णय भएको छ ।
बैठकले महासंघका संस्थापक र शाखाका पूर्व अध्यक्षहरुलाई उनीहरुको चाहना अनुसार मानार्थ सदस्यमा सिफारिश गर्ने निर्णय गरेको छ । त्यस्तै दाङ शाखामा सदस्य रहेका तर हाल अन्य जिल्लामा क्रियाशिल रहेका सदस्यको हकमा कार्यरत जिल्लामै सदस्यता स्थानान्तरण गर्न अनुरोध गर्ने निर्णय समेत भएको छ ।
