(ABC-Sanchar)
पर्सा । वीरगञ्ज पूर्व मन्त्री एवम् सङ्घीय सांसद किसान श्रेष्ठको पहलमा पूर्वपश्चिम राजमार्गको वीरगञ्जबाट पथलैयासम्मका लागि विद्युतीय बस सञ्चालनमा आएको छ ।
स्थानीय व्यवसायी भेष बहादुर थापाले सुन्दर यातायात मार्फत वीरगञ्ज-पथलैया औद्योगिक कोरिडोरमा विद्युतीय बस सञ्चालनमा ल्याएका हुन् ।
असार अन्तिम सातादेखि सुविधायुक्त विद्युतीय बसले दैनिक वीरगञ्जदेखि पूर्वपश्चिम राजमार्ग प्रवेश स्थल पथलैयासम्मको यात्रा गर्नेछ । वीरगञ्ज-पथलैया सडकमा चल्न सुन्दर यातायातले चार वटा बस सञ्चालनमा ल्याउने तयारी गरिरहेको सुन्दर यातायातका अध्यक्ष थापाले जानकारी दिए ।
वीरगञ्जबाट छुट्ने बस औद्योगिक कोरिडोरअन्तर्गत पर्ने बजारहरू परवानीपुर, जितपुर, सिमरा हुँदै पथलैयासम्मको २५ किलोमिटर लामो यात्रा गर्ने थापाले बताए । बस व्यापारिक ६ लेन सडकमा चल्नेछ ।
पूर्व मन्त्री एवम् सङ्घीय सांसद किसान श्रेष्ठको आग्रहमा आफूले बस सेवा सञ्चालनमा ल्याएको सुन्दर यातायातका अध्यक्ष थापाले बताए । उनले असारको अन्तिम दिनतिर बस सेवा सुरु हुने जानकारी पनि दिए । उनले भने, “अब हामी असारको अन्तिम साताको कुनै पनि दिन कोरिडोरमा बिजुली बस सञ्चालन गर्नेछौँ ।” बिजुली बस जर्मनी प्रविधिमा चीनले उत्पादन गरेका हुन् । यी बस युरो मापदण्डका हुन् । यस्ता बस विश्वका सम्पन्न मुलुकमा समेत प्रचलनमा आएको र अन्तर्राष्ट्रिय स्तरका भएको थापाले दाबी गरे ।
अहिले बिजुली बस चार्ज गर्नका लागि सिमरा क्षेत्रमा चार्जिङ स्टेसन बनाउने काम भइरहेको छ । कम्पनीका अनुसार स्टेसनको काम अन्तिम अवस्थामा पुगेको छ भने बस चीनबाट वीरगञ्जसम्म आइसकेका छन् । ३५ सिट क्षमताका बसमा जिपिएस प्रविधि जडान गरिने छ । कम्पनीलाई केन्द्रीय कार्यालयबाट बस र यात्रुको मनिटरिङ गर्न सजिलो हुनेछ ।
कम्पनीले सिमरा क्षेत्रमा बनाउन लागेको चार्जिङ स्टेसन सौर्य तथा विद्युत् दुवैको कनेक्सन हुनेछ । यसबाट अन्य निजी तथा सार्वजनिक सवारीसाधनले पनि प्रयोग गर्न सक्नेछन् । कम्पनीका अनुसार तीनदेखि ५ रुपैयाँ प्रतियुनिट शुल्क लाग्नेछ । कम्पनीले चार्जिङ स्टेसनमा एटिएम, कोल्ड स्टोर, रेस्टरूम पनि बनाउने छ ।
निजी क्षेत्रमा विद्युतीय बस सञ्चालन गर्ने सुन्दर यातायात पहिलो कम्पनी हो । यो कम्पनीले देशका अन्य भागमा १९ वटा बस सञ्चालन गरेर सेवा दिँदै आएको छ । अहिले यो रुटमा सेवा विस्तार गरेको हो । आगामी आर्थिक वर्षभित्र देशका अन्य स्थानमा सेवा विस्तार गर्ने योजना रहेको अध्यक्ष थापाले जानकारी दिए ।
कम्पनी ऐनअनुसार चालक, सहचालकदेखि मनिटरिङ अपरेसन विभाग, चार्जिङ स्टेसनमा कार्यरत प्राविधिक कर्मचारी सबै माग भइसकेको कम्पनीले जनाएको छ । यातायात व्यवस्था विभागले तोकेको मापदण्डअनुसार अपाङ्गता भएका, वृद्ध वृद्धा, विद्यार्थी लगायतलाई भाडामा छुट दिइने छ । सवारीको सुविधाअनुसार तीन तहको भाडा दर रहे पनि लोकल बसको भन्दा भाडा दर धेरै हुनेछैन । तराईको गर्मीमा बिजुलीको चिसो सुविधासहितको सेवा यात्रुलाई दिने लक्ष्य राखेको अध्यक्ष थापाले बताए ।
एयर कन्डिसनर सेवासहितका यी विद्युतीय बस वातावरणमैत्री रहेको कम्पनीको दाबी छ । बसमा यात्रा गर्दा टाउको नदुख्ने, रिङ्गटा नलाग्ने, बान्ता नहुने र आरामदायी यात्रा हुनेछ । कुनै प्रकारको इन्धन खपत नगर्ने भएकाले यो बस डिजेल गाडीको जस्तो चर्को ध्वनि रहित हुनेछ ।
कोरिडोरमा सञ्चालन लगत्तै कम्पनीले वीरगञ्ज-हेटौँडामा २० सिटे ४ वटा बसले सेवा विस्तार गर्ने जनाएको छ, जुन बस भैरहवा भन्सारमा यही असार २५ गते आइपुग्ने बताइएको छ ।