ABC (क्राईमबिट)
काठमाडौं । नक्कली कागजपत्र बनाएर प्राकृतिक विपत्तिको शिकार भएको भन्दै भारतबाट आएर भिक मागिरहेका १२ नाबालिगसहित २४ जना भिखारीलाई नेपाल प्रहरीले पक्राउ गरी फिर्ता (भारत) पठाएको छ ।
नेपाल–भारत सीमा क्षेत्रको नेपालतर्फको बिर्तामोडको सडकमा भीख माग्ने क्रममा राजस्थानका २४ जनालाई प्रहरीले नियन्त्रणमा लिएको हो । काखमा छ महिनाको बच्चासहित कैयौँ साना बालबालिकालाई साथमा राखेर विभिन्न बहाना बनाएर पैसा मागेको प्रहरीले जनाएको छ ।
प्रहरीका अनुसार उनीहरुले भारतमा प्राकृतिक प्रकोपको सिकार भएको र विपद्का कारण घरबार गुमाएको दाबी गरी नक्कली कागजात बनाएका थिए । प्रहरीले बिर्तामोड नगरपालिकाको सहयोगमा बिर्तामोड बसपार्कमा भाडाको कोठामा समूह बनाएर बस्दै आएको फेला पारेको हो ।
प्रहरीका अनुसार उनीहरुलाई प्रहरीले नियन्त्रणमा लिएर प्रहरीको गाडीमा कङ्करभिट्टाको मेची पुलबाट सीमापार लगिएको थियो । नेपालमा चाडपर्वको सिजन लाग्ने वित्तिकै सीमापारबाट भिखारीहरुको संख्या नेपालमा बढ्न थालेको प्रहरीले जनाएको छ ।
