(ABC-Sanchar)
रुपन्देही । सामाजिक सञ्जाल टिकटकमा अश्लील हरकत गरेको भन्दै नेकपा माओवादी केन्द्रले एक जना महिला नेतृलाई निलम्बन गरेको छ ।
शनिवार एक विज्ञप्ति प्रकाशित गर्दै पार्टीको सैन मैना नगर समितिले नेतृ शान्ति बराललाई सम्पूर्ण जिम्मेवारीबाट मुक्त गरेको हो ।
“पार्टी अनुशासनभन्दा बाहिर गएर आफ्नो विचार व्यवहार प्रस्तुत गर्ने छुट कसैलाई पनि नभएको कुरा पुनः स्मरण गराउन चाहन्छौँ,” समितिको विज्ञप्तिमा भनिएको छ । बराल माओवादीको सैन मैना नगर कमिटी सदस्य पदमा रहेकी थिइन् ।
उनीमाथि पार्टीको साङ्गठनिक जिम्मेवारी, पार्टीमा हुनुपर्ने सामाजिक तथा सांस्कृतिक अनुशासन तथा आम नेपाली सामाजिक तथा सांस्कृतिक व्यवहार विरुद्ध गई सामाजिक सञ्जालमा प्रस्तुत हुन गएको आरोप लगाइएको छ । “उक्त कारण समेतले निजलाई पार्टी सङ्गठनको सम्पूर्ण जिम्मेवारी र पार्टी सदस्य सम्मबाट निलम्बन गरिएको जानकारी गराउँदछौ,” विज्ञप्तिमा अगाडि भनिएको छ ।
