काठमाडौं । अख्तियार दुरुपयोग अनुसन्धान आयोगले ललितपुर महानगरपालिकाका मेयर चिरीबाबु महर्जनलाई बयानका लागि अर्को पत्र पनि काटेको छ ।
बाढी पीडितलाई रकम वितरण गरेको विषयमा बयानका लागि बुधबार पत्र पठाएको अख्तियारले बिहीबार प्रेस संयोजक नियुक्तिका विषयमा बयानका लागि अर्को पत्र पठाएको हो ।
प्रेस संयोजक नियुक्तिका विषयमा बयानका लागि बोलाइएको पत्र अख्तियारका कर्मचारीले बिहीबार दिउँसो मेयर महर्जनलाई कार्यकक्षमै पुगेर दिएका छन् ।
यसअघि मंगलबार अख्तियारले २०७७ सालमा धापाखेल क्षेत्रका बाढी पीडितलाई महानगरको कार्यपालिका बैठकको निर्णय विपरीत डेढ लाख र दुई लाख रुपैयाँ राहत दिएका विषयमा उजुरी परेको भन्दै बयानका लागि महर्जनलाई बोलाएको थियो ।
अख्तियारले मेयर महर्जनलाई २६ र २८ असारमा टंगालस्थित कार्यालयमा आउनू भनेको छ ।
ललितपुर महानगरपालिकाले अख्तियारकी आयुक्त सुमित्रा अमात्यको चाकुपाटस्थित घरले सार्वजनिक जग्गा मिचेको भन्दै डोजर लगाएपछि अख्तियारले त्यसै दिन र भोलिपल्ट गरी मेयर महर्जनलाई दुईवटा पत्र पठाएर बयानका लागि बोलाएको हो ।
