काठमाडौं । नेपाल प्रहरीमा एक जना प्रहरी अतिरिक्त महानिरीक्षक (एआइजी) र एक जना डिआइजीको पद रिक्त छ । एआइजी उमेशराज जोशी असार १९ र एआईजीमा सिफारिस डिआइजी पोषराज पोखरेल २१ गतेबाट अनिवार्य अवकासमा गएपछि दुई पद रिक्त भएको हो ।
एक एआईजीका लागि अहिले दर्जन डीआइजीहरु प्रतिस्पर्धामा छन् । जसमा अहिले भतरबहादुर बोहरा, दुर्गा सिंह, रवीन्द्र केसी, रामदत्त जोशी, बुद्धिराज गुरुङ, किरण राणा, कुवेर कडायत, केदार ढकाल, विष्णुकुमार केसी, चन्द्रकुबेर खापुङ, जनक भट्टराई, लालमणि आचार्य लगायतका डिआइजी एआइजीको प्रतिस्पर्धामा छन् ।
यस्तै गत महिनामात्रै बढुवा भएका कृष्णहरी शर्मा पोखरेल, दानबहादुर कार्की, डा.मनोज कुमार केसी र राजन अधिकारी पनि डीआइजीमा कार्यरत छन् । तर उनीहरु एक महिनाअघि मात्रै बढुवा भएकाले एआईजी बन्ने सम्भावना छैन । अब सरकारले सुरुमा रिक्त एआइजीमा हाल कार्यरत डिआइजीहरूमध्येबाट एक जनालाई बढुवा गरेपछि मात्रै एसएसपीबाट डिआइजीमा बढुवा सिफारिस गर्नेछ ।
जसमा हाल कार्यरत एसएसपीमा ध्रुवराज राउत, भोलाबहादुर रावल, दिल्लीराज बिष्ट र गणेश चन्द सबैभन्दा सिनियर हुन् । चन्द २०६४ पुस ३० गते डीएसपीमा बढुवा भएका थिए । एसपी बढुवा हुँदा पनि उनी ब्याचीबाट छुटे ।
२०७४ साउन १९ गते एसपी बनेका चन्द एसएसपी भने २०७९ साउन ३ मा मात्रै बने । उनी आगामी मंसिर २५ गते अनिवार्य अवकासमा जानेछन् । यसबाहेक ठूलो संख्यामा भदौ १६ गते प्रहरी अधिकृतहरू अवकासमा जाँदैछन् । एआइजी श्यामराज ज्ञवालीले २० भदौमा अवकाश पाउनेछन् ।
यसरी अवकाश पाउन लागेकाहरु धेरैको उमेर ५५ भन्दा कम छ । ३० वर्षे सेवाहदका कारण ठूलो संख्यामा प्रहरीले अवकाश पाउन लागेका हुन् । जसकारण सो टोली ३० वर्षे सेवाहद हटाउने लबिङमा लागेको छ ।
गृह मन्त्रालयले पनि यस विषयमा अध्ययन गर्न एक कार्यदल बनाएको थियो । कार्यदलले प्रतिवेदन पनि दिइसकेको छ । तर पनि त्यो प्रतिवेदन कार्यान्वयन हुने सम्भावना निकै कमजोर रहेको छ ।
अब नयाँ सरकार बन्ने भएपछि ३० वर्षे सेवाहदको विषयमा के निर्णय हुन्छ हेर्न बाँकी छ । एमाले अध्यक्ष केपी शर्मा ओलीले सार्वजनिक रुपमै सेवाहद हटाउनुपर्ने बताउँदै आएका भएपनि यो विषयमा नीतिगत निर्णय नै गर्नुपर्ने भएकाले यही वर्ष हुने संभावना निकै कमजोर रहेको छ ।
