बाँके । जिल्लाका विभिन्न संवेदनशील क्षेत्रको पहिचान गरि सोही अनुसार नेपाल प्रहरी र ट्राफिक प्रहरी परिचालन गरेर चेकजाँचलाई कडाइ गरिएको जिल्ला प्रहरी कार्यालय बाँकेका प्रहरी प्रमुख एसपी तुलबहादुर कार्कीले बताए ।
तिहार र छठ पर्व मनाउन आउने र जाने सर्वसाधारणको सुरक्षालाई मध्यनजर गरि जिल्लाको तीन ठाउँमा सहायता कक्ष (हेल्प डेस्क) संचालनमा ल्याएको बताए । ‘सर्वसाधारण यात्रुलाई सुरक्षित रुपमा गन्तब्यसम्म पुर्याउन र लुटिन तथा ठगिनबाट जोगाउन यात्रुको बढि चाप हुने ठाउँमा हेल्प डेस्क संचालनमा ल्याइएको छ,।
उनका अनुसार, नेपालगन्जको जमुनाहा नाका, बस पार्क र कोहलपुरस्थित बस पार्कमा हेल्प डेस्क संचालनमा ल्याइएको छ । तिहारलाई लक्षित गरि बाँकेमा एक हजार प्रहरी परिचालन गरिएको बताए । ‘संवेदनशील ठाउँमा निगरानी बढाउन र कुनै घटना घटेको खवर पाउने वित्तिकै १५ मिनेटमा प्रहरी पुग्ने ब्यवस्था मिलाइएको छ,’ उनले भने, तिहारका बेला चोरी बढ्ने भएकोले यो अवधिभर पैदल र गाडीबाट गस्ती गर्ने ब्यवस्था मिलाएका छौँ ।
प्रहरीसँगै तालिम प्राप्त कुकुरबाट पनि चेकजाँच भइरहेको उनको भनाई छ । ‘जमुनाहा नाका र राँझा एयरपोर्टमा तालिम प्राप्त कुकुरबाट जाँच भइरहेको छ,’ उनले भने, ‘उछृंखल गतिविधि गर्ने समुह र ब्यक्तिको पहिचान गरि निगरानी गरिरहेका छौँ । तिहार र छठलाई मर्यादित बनाउन र शान्त बातावरणमा सम्पन्न गर्न हरसम्भवको प्रयास जारी राखेका छौँ ।’
