काठमाडौं । कोशी प्रदेशका पूर्वआन्तरिक मामिला तथा कानुनमन्त्री लिलाबल्लभ अधिकारीलाई प्रहरीले मानव बेचबिखन तथा ओसारपसार (नियन्त्रण) ऐन, २०६४ अन्तर्गतको कसुरमा अदालतबाट म्याद लिएर अनुसन्धान थालेको छ ।
प्रहरीले यसअघि ६ जनालाई पक्राउ गरेर लिखत किर्तेसम्बन्धी कसुरमा अनुसन्धान थालेको थियो । पूर्वमन्त्री पक्राउ परेसँगै सो मुद्दा प्रहरीले मानव बेचबिखनमा पनि रुपान्तरण गरेको छ । पूर्वमन्त्री अधिकारी अर्काको खर्चमा जापान गएको देखिएको र ३ जनासँग बिचौलियाले रकम पनि लिएको पुष्टि भएपछि प्रहरीले आफ्नै प्रतिवेदनको आधारमा मुद्दा रुपान्तरण गरेको हो । अनुसन्धानमा संलग्न एकजना प्रहरी अधिकृत भन्छन्, ‘प्रहरी प्रतिवेदनको आधारमा लिखत किर्तेसँगै मानव बेचबिखन मुद्दा पनि यसमा जोडेर अनुसन्धान थालेका छौँ ।’
कार्तिक ११ मा तत्कालीन मन्त्री अधिकारी, खोटाङका ३६ वर्षीय दावा शेर्पा, खोटाङकै जनक राई र रसुवा घर भएका २२ वर्षीय कञ्चन देवकोटा क्याथे प्यासिफिकको उडानमार्फत जापान गएका हुन् । सांस्कृतिक कार्यक्रमका लागि त्यहाँ हिँडेका तत्कालीन मन्त्री अधिकारी र कञ्चन देवकोटाका लागि बिचौलियाले टोकियोमा एउटै होटल बुकिङ गरिदिएको भेटिएको छ । अनुसन्धानमा संलग्न एकजना अधिकृत भन्छन्, ‘तत्कालीन मन्त्री अधिकारी र कञ्चन देवकोटालाई बस्ने व्यवस्था एउटै होटलमा गरेको भेटिएको छ ।’
टोकियो विमानस्थलबाट डिपोर्ट (निष्कासन) भएर काठमाडौँ फर्किएका तत्कालीन मन्त्रीसहित ४ जना र ३ जना बिचौलियालाई प्रहरीले पक्राउ गरेको छ । पक्राउ पर्ने बिचौलियाहरूमा धादिङ घर भएका ३४ वर्षीय महेश पाण्डे, दोलखा घर भएका ३० वर्षीय वीरबहादुर सुनार र नुवाकोट घर भएका २३ वर्षीय जुगल रिजाल छन् ।
दावा शेर्पाका भाइ जापानमा बस्छन् । नेपालमा ट्रेकिङ्गको काम गर्ने शेर्पाका भाइले दोलखाका वीरबहादुरलाई चिनेका थिए । त्यही चिनजानका कारण जापान जान दावाले वीरबहादुरको बैंक खातामा ११ लाख ५५ हजार डिपोजिट गरिएको प्रहरीको अनुसन्धानबाट थाहा भएको छ ।
कञ्चन देवकोटा विद्यार्थी हुन् । बिएमा पढ्दै गरेका उनले जापान जान खोज्दा धादिङका महेश पाण्डेलाई भेटेको प्रहरीलाई बताएका छन् । देवकोटाले जापान जान १० लाख बुझाएको भेटिएको छ । कार्तिक १४ मा डिपोर्ट भएर फर्केपछि उनीहरु काठमाडौँ विमानस्थलमा पक्राउ परेका हुन् ।
जनक राई यसअघि कपनमा फार्म हाउस चलाउँथे । फार्म हाउस चल्न छाडेपछि बेचेर उनी बिचौलियालाई रकम बुझाएर जापान हिँडेका हुन् ।
जापानबाट फिर्ता भएका शेर्पाले खोटाङस्थित ऐशेलुखर्क गाउँपालिका वडा नम्बर–२ को वडा सदस्यको परिचयपत्र, देवकोटा र राईले कोशीको आन्तरिक मामिला तथा कानुन मन्त्रालयको ‘सहायक’को परिचयपत्र बनाएको भेटिएको छ ।
जापान पठाउने ‘गिरोह’ले नै फर्जी कागजात बनाएर उनीहरु उड्नुअघि विमानस्थलमा लगेर दिएको अनुसन्धानमा संलग्न एकजना प्रहरी अधिकृतले बताए । उनले भने, ‘गिरोहका सदस्यले विमानस्थलमा कञ्चन देवकोटालाई ३ वटा परिचयपत्र दिएको देखिन्छ ।’ सो परिचयपत्र देवकोटाले अरु दुईजनालाई हस्तान्तरण गरे ।
