पर्सा । सशस्त्र प्रहरी बल, नेपाल र भारतीय सशस्त्र सीमा बल (एसएसबी) बीच नियमित रूपमा हुँदै आएको समन्वयात्मक बैठक शुक्रबार सशस्त्र प्रहरी बल, नेपाल नं. २ छिन्नमस्ता बाहिनी मुख्यालय महोत्तरीको आयोजनामा सम्पन्न भएको छ।
उक्त बैठकमा सशस्त्र प्रहरी बल, नेपालका तर्फबाट बाहिनीपति सशस्त्र प्रहरी नायव महानिरीक्षक (डीआईजी) कालीदास धौवजीको नेतृत्वमा सहभागीता रहेको थियो भने भारतीय एसएसबीका तर्फबाट सेक्टर हेडक्वार्टर मुजफ्फरपुरका डीआईजी दीपक कुमार (आईपीएस), सेक्टर हेडक्वार्टर पुरेनियाका सेक्टर कमाण्डर डीआईजी राजेश टिकु, र सेक्टर हेडक्वार्टर बेतियाका सेक्टर कमाण्डर डीआईजी एस. सुर्बमेनियमको उपस्थिति रहेको थियो।
मधेश प्रदेशस्थित सशस्त्र प्रहरी बल, नेपालका गणपति, निमित्त गणपति, अधिकृतहरू र एसएसबीका बटालियन कमाण्डेन्टहरूको पनि उपस्थिति रहेको यस कार्यक्रममा सीमा सुरक्षा, सीमा अपराध नियन्त्रण, लागूऔषध नियन्त्रण, र सीमामा हुने अन्य आपराधिक गतिविधि रोकथामका विषयमा विस्तृत छलफल भएको थियो।
