काठमाडौँ । प्रमुख जिल्ला अधिकारी (प्रजिअ) जयनारायण आचार्यले चार महिनाको कार्यकालमा काठमाडौँको प्रशासनलाई नागरिक सेवा सुधार, प्रभावकारी व्यवस्थापन र विपद् व्यवस्थापनमा नयाँ उचाइमा पुर्याएका छन् । २०८१ भाद्र २६ देखि पौष २३ सम्मको यस अवधिमा उनले सुधारका धेरै महत्त्वपूर्ण पहल र उपलब्धि हासिल गरे ।
सिडिओ आचार्यले कार्यालयको ढोका नागरिकहरूका लागि खुला राख्ने व्यवस्थासँगै सेवाग्राहीहरूले सिधै गुनासो राख्न सक्ने सुविधा प्रदान गरे । यसले नागरिकहरूको गुनासो र समस्याको समाधानलाई सहज बनाएको जिल्ला प्रशासन कार्यालयले जनाएको छ । कार्यालय परिसरभित्र बिचौलिया निषेधलाई कडाइका साथ कार्यान्वयन गरिनु पनि सुधारका क्षेत्रमा अर्को उदाहरणीय कदम रहेको छ ।
राष्ट्रिय परिचयपत्रको स्टक क्लियरेन्स गर्न २०८० चैत मसान्तसम्म नाम दर्ता गरिसकेका व्यक्तिहरूलाई कार्ड वितरणको प्रक्रिया सहजीकरण गरिएको थियो । कर्मचारीहरूको मनोबल बढाउन मासिक रूपमा उत्कृष्ट कर्मचारी छनोट गरी सम्मान गर्ने अभियान सुरु गरिएको छ ।
सिडिओ आचार्यले नागरिकहरूको व्यक्तिगत समस्यामा पनि उत्तिकै ध्यान पुर्याएका थिए । आरती रावल, रुवी खान र खगेन्द्र सुनारजस्ता व्यक्तिहरूका समस्याहरू सम्बोधन गर्न वार्ता तथा समन्वय मार्फत समाधान गरिएको छ । नागढुङ्गा सुरुङ मार्गको बाँकी जग्गासम्बन्धी समस्या समाधान गर्न पनि उनले समन्वयकारी भूमिका निभाए ।
अपाङ्गता र अशक्त नागरिकहरूका लागि घरमै नागरिकता वितरणको व्यवस्था गरिनु, क्युआर कोड प्रणालीमार्फत गुनासो सुनुवाइको प्रक्रियालाई सरल बनाउनु र शाखाहरूको नियमित निरीक्षण तथा अनुगमन गर्दै प्रभावकारी सेवा प्रवाह सुनिश्चित गर्नु उनको सुधारात्मक कदमहरूमा पर्दछन् ।
मुद्दा व्यवस्थापनमा प्रगति
सिडिओ आचार्यको कार्यकालमा मुद्दा व्यवस्थापन पनि प्रभावकारी देखिएको छ । २०८१ भाद्र २६ देखि पौष २३ सम्म अभद्र व्यवहार, जुवा, कालोबजारी, खाद्य स्वच्छता र सवारी क्षतिपूर्तिसम्बन्धी १,२४३ वटा मुद्दा दर्ता गरिए । तीमध्ये १,१४० वटा मुद्दा फर्छ्यौट गरियो, जसले मुद्दा व्यवस्थापन प्रक्रियामा उल्लेख्य सुधार देखिएको छ ।
विपद् व्यवस्थापन र राहत वितरण
२०८१ सालको असोजमा अविरल वर्षापछि आएको बाढी र पहिरोले क्षति पुर्याएका नागरिकहरूको उद्धार र राहत वितरणमा सिडिओ आचार्यको नेतृत्व उदाहरणीय रह्यो । विपद् पीडित उद्धार तथा राहत मापदण्ड, २०७७ अनुसार, ३६ लाख रुपैयाँ नगद राहत वितरण गरिएको थियो । समयमै उद्धार तथा राहत वितरण हुन नसकेको गुनासो व्याप्त रहँदा काठमाडौँ प्रशासनको भूमिका भने प्रशंसनीय नै रह्यो ।
यस अन्तर्गत दक्षिणकाली, चन्द्रागिरि, नागार्जुन, कीर्तिपुर, गोकर्णेश्वर, शंखरापुर र काठमाडौँ महानगरपालिकाका प्रभावित परिवारहरूले घरमै राहत पाए । राहत वितरणले बाढी तथा पहिरो पीडितहरूको जीवनलाई सहज बनाएको थियो ।
नागरिक सेवाको नयाँ उचाइ
सिडिओ जयनारायण आचार्यको चार महिनाको कार्यकाल नागरिक सेवा सुधारका लागि प्रेरणादायी रह्यो । विशेष गरी ढोकामै केरकार हुने र भेटका लागि मात्रै पनि पावर र पहुँचको जगजगी रहने सरकारी सेवामा प्रजिअ आचार्यको ‘खुल्ला ढोका’ले सेवाका लागि पुग्ने नागरिकहरूले नौलो र उत्साहपूर्ण अनुभूति गर्न पाए । सुन्दा सामान्य भएपछि सरल भेटले मात्रै आधा समस्या समाधान भएको महसुस गर्ने सेवाग्राहीहरूका लागि भने यो नौलो स्वाद पनि रह्यो ।
यसर्थ पनि भन्न सकिन्छ, प्रजिअ आचार्यका प्रयासहरूले काठमाडौँको प्रशासनिक सेवा र र आपद्कालीन व्यवस्थापनलाई प्रभावकारी बनाउन उल्लेखनीय भूमिका खेल्यो ।
सोमबार मात्रै गृह मन्त्रालयले काठमाडौँलगायत सात जिल्लाका प्रमुख जिल्ला अधिकारी सिडिओसहित १२ जना सहसचिव तथा उपसचिवहरूको सरुवा गरेको थियो । जसमा प्रभावकारी कार्यसम्पादन हुँदा पनि छोटो कार्यकालमै आचार्य सरुवामा परेका थिए ।
बिकट कर्णालीबाट काठमाडौँ प्रशासन हाँक्ने नगण्य प्रशासकमध्ये एक रहेका आचार्य कार्यसम्पादनमा अब्बल र सरल कर्मचारीका रूपमा चिनिन्छन् ।
जिल्ला प्रशासन कार्यालयले आज एक कार्यक्रममा बिच आचार्यको बिदाइ गरेको छ । सहसचिव आचार्यले अब गृह मन्त्रालयको आन्तरिक व्यवस्थापन महाशाखा प्रमुखको जिम्मेवारी सम्हाल्ने छन् ।
