काठमाडौं । भारतको पश्चिम महाराष्ट्र राज्यमा भएको रेल दुर्घटनामा कम्तीमा ११ जनाको मृत्यु भएको छ भने ५ जना घाइते भएका छन् ।
घटनास्थल नजिकका स्थानीय सञ्चारमाध्यमका अनुसार रेलमा आगलागी भएको आशङ्कामा केही यात्रुहरूले आपत्कालीन ब्रेक (अलार्म चेन) तानेर रेल रोकेपछि उनीहरू रेलबाट ओर्लिएका थिए । तर, छेउको पटरीमा आएका अर्को रेलले उनीहरूलाई किच्दा दुर्घटना भएको हो ।
नाशिक क्षेत्रका वरिष्ठ रेलवे अधिकारी प्रवीण गेडमका अनुसार “घटनामा ११ जनाको मृत्यु भएको र ५ जना घाइते भएका छन् ।” भारतीय समाचार संस्था एएनआईले यसबारे जानकारी दिएको छ ।
महाराष्ट्रका मुख्यमन्त्री देवेन्द्र फडणवीसले घटनास्थलमा एम्बुलेन्स पठाइएको र घाइतेहरूको उपचारको लागि आवश्यक व्यवस्था मिलाइएको जानकारी दिए । उनले सामाजिक सञ्जाल ‘एक्स’मा लेख्दै भने, “आपत्कालीन उपकरणहरू जस्तै सिसा काट्ने उपकरण, फ्लडलाइट लगायत तयारी अवस्थामा राखिएका छन् ।”
घटनास्थल भारतको आर्थिक राजधानी मुम्बईबाट करिब चार सय किलोमिटर टाढा पर्दछ ।
भारत विश्वकै चौथो ठूलो रेल सञ्जाल भएको देश हो, जसलाई ३० अर्ब डलरको लगानीमा आधुनिक बनाउन पहल भइरहेको छ । प्रधानमन्त्री नरेन्द्र मोदीको नेतृत्वमा रेलको कनेक्टिभिटी सुधारका लागि उक्त प्रयास भइरहेको हो ।
