काठमाडौं । राष्ट्रिय स्वतन्त्र पार्टीका सभापति रवि लामिछानेले कास्की जिल्ला अदालतको थुनछेक आदेशविरुद्ध उच्च अदालत पोखरामा पुनरावेदन गर्ने भएका छन् ।
न्यायाधीश नितिज राईको इजलासबाट ६५ लाख धरौटी तिरेर रिहा भएका लामिछाने धरौटी रकम बदर गरि आफूलाई साधारण तारेखमा नै छोड्नुपर्ने माग सहित पुनरावेदनका लागि उच्च अदालत पुगेका हुन् ।
लामिछानेका एक कानुन व्यवसायीका अनुसार जिल्ला अदालतले तोकेको धरौटी रकम बदर गरी साधारण तारेखमा बसी मुद्दा पुर्पक्ष गर्न पाउने आदेशको माग गर्दै आजै उच्च अदालत कास्कीमा निवेदन दर्ता हुँदै छ ।
यता, लामिछानेलाई धरौटीमा छाड्ने कास्की जिल्ला अदालतको आदेश बदर गरी थुनामा राख्नुपर्ने माग सहित सरकारी वकिलको कार्यालयले यस अघि नै उच्च अदालत पोखरामा निवेदन दर्ता गराइसकेको छ । सरकारी वकिलको निवेदन पछि उच्च अदालत कास्कीका न्यायाधीश राजकुमार खतिवडाले धरौटीमा छाड्नुका कारण प्रतिवेदन झिकाउने आदेश गरिसकेका छन् ।
लामिछानेको निवेदन दर्ता भएपछि सरकारी वकिलसहितको निवेदनमा सँगै राखि मुद्दा अघि बढ्ने छ । सहकारीमा प्रत्यक्ष रूपमा संलग्न नभएको व्यक्तिलाई ठूलो रकम धरौटी मागिनु न्यायसंगत नरहेको रविका कानून व्यवसायीहरु बताउँछन् ।
कात्तिक २ गते काठमाडौंबाट पक्राउ परि कास्की प्रहरीको हिरासतमा रहेका उनी गत पुस २५ गते धरौटी रकम बुझाएर थुनामुक्त भएका थिए । त्यसपछि काठमाडौं अदालतबाट ६० राख र रुपन्देही अदालतबाट १ करोड धरौटी बुझाएर रिहा भएका छन् ।
