धनगढी । सुदूरपश्चिम प्रदेश प्रहरी प्रमुख प्रहरी नायव महानिरीक्षक गणेश चन्दले प्रदेश अन्तर्गत रहेका राजमार्ग सुरक्षा तथा ट्राफिक व्यवस्थापन कार्यालय अत्तरिया, कैलाली, जिल्ला ट्राफिक प्रहरी कार्यालय कैलाली, कञ्चनपुर, डोटी, अछाम, बाजुरा, बझाङ, डडेल्धुरा, बैतडी र दार्चुलामा कार्यरत जिल्ला ट्राफिक प्रमुखहरुलाई भर्चुअल मिटिङ मार्फत निर्देशन दिनु भएको छ ।
सोही क्रममा उहाँले जिल्लाहरुको ट्राफिक व्यवस्थापनको अवस्था सम्बन्धमा जानकारी लिदै, ओभरलोड, भवरलोड, क्षमता भन्दा बढी यात्रु बोक्ने, प्राईभेट नम्बर प्लेट भएका सवारी साधनले यात्रु बोक्ने, रुट पर्मिट बिना सवारी साधन चलाउने, नविकरण फेल भएका सवारी साधनहरु निर्वाध रुपमा चलाउने, क्षमता भन्दा बढी खनिजजन्य पदार्थको भार बोकी सडकमा पानी चुहाउदै गुड्ने जस्ता ट्राफिक नियम वितरितका क्रियाकलापहरु निरुत्साहित गरि सवारी दुर्घटना न्यूनिकरण गर्दै सडक सुरक्षाका लागि सरोकारवाला निकाय तथा नागरिक समाजसंग सहकार्य गरि प्रभावकारी रुपमा जनचेतनामुलक कार्यक्रमहरु संचालन गर्न, पुर्ण ब्यावसायिक तवरले ट्राफिक चेकजाँच गर्न, नागरिकलाई अनाबश्यक हैरानी नहुने गरि समन्वयात्मक, सहभागितामुलक र जनमुखी ट्राफिक व्यवस्थापनमा समर्पित रहि उच्च अनुशासनका साथ त्रुटीरहित ढंगबाट कार्य सम्पादन गर्न समेत निर्देशन दिनुभयो ।
