सागर थापा (क्राईमबिट)
काठमाडौं पुस २७ समुदाय-प्रहरी साझेदारी अन्तर्गत सुरक्षा सुदृढिकरण सम्बन्धी अन्तरक्रिया तथा जनचेतनामूलक कार्यक्रम नयाँबानेश्वरमा शनिबार सम्पन्न भएको छ ।
कार्यक्रममा महानगरीय प्रहरी कार्यालय रानीपोखरीका प्रमुख प्रहरी नायव महानिरीक्षक विश्वराज पोखरेलले महिला हिंसा, जबरजस्ती करणी तथा आत्महत्या लगायतका सामाजिक अपराध रोकथाम र नियन्त्रण गर्न समुदाय-प्रहरी साझेदारी कार्यक्रम प्रभावकारी रहेको बताए ।
आर्थिक पक्षमा शून्य सहनशीलता कायम गरी प्रहरीको आचरण व्यवहारमा अझ सुधार गर्दै थप गुणस्तरीय सेवा प्रवाह गर्नु प्रहरीको उद्धेश्य भएको उनले बताए ।
प्रा.डा. वासुदेव त्रिपाठी, स्थानीय जनप्रतिनिधिहरु समेतले मन्तव्य व्यक्त गरेका उक्त कार्यक्रममा मानव सेवा आश्रम तथा अचेल नाट्य समूहका कलाकारहरूले लागूऔषधको सेवनले समाजमा पार्ने नकारात्मक प्रभाव र कसरी लागूऔषधको कुलतमा पर्दछन् भन्ने सम्बन्धि जनचेतनामूलक नाटक प्रदर्शन गरेका थिए ।
महानगरीय प्रहरी वृत्त नयाँबानेश्वर र सामुदायिक सेवा केन्द्र बानेश्वरद्वारा आयोजित उक्त कार्यक्रममा स्थानीय तहका जनप्रतिनिधिहरु, सामुदायिक सेवा केन्द्रका प्रतिनिधिहरु, विभिन्न संघ संस्था तथा विद्यालयका प्रतिनिधिहरु, संचारकर्मी र स्थानियबासी लगायतको उपस्थिति रहेको थियो ।
