काठमाडौं । राष्ट्रिय स्वतन्त्र पार्टीका सभापति रवि लामिछाने र पूर्वडीआईजी तथा तत्कालीन गोर्खा मिडियाका सञ्चालक छविलाल जोशीले आफूविरुद्ध लागेको सहकारीसम्बन्धी मुद्दामा बिगोबराबरको जमानत बुझाएर थुनामुक्त हुन माग गर्दै दिएको निवेदनमा आज सुनुवाई हुँदैछ । उच्च अदालत तुलसीपुरको बुटवल इजलास स्रोतका अनुसार यसअघि विभिन्न कारणले सुनुवाई सरेकोमा आज भने सुनुवाई हुने अवस्था छ । सुनुवाईपछि फैसला समेत आजै आउन सक्छ ।
यसअघि मंसिर २५ गतेको पेशी हेर्न नमिल्ने भएपछि स्थगित भएको थियो । त्यसअघिको सुनुवाई लामिछानेकै कानुन व्यवसायीले स्थगित गराएका थिए । आज पेशी तोकिएको र यसअघि रवि लामिछाने पक्षबाट दुई पटक पेशी स्थगित भइसकेकाले आज सुनुवाइ हुने सम्भावना उच्च रहेको अदालत स्रोत बताउँछ । नियमअनुसार विपक्षले बढीमा २ पटक मात्र पेशी स्थगित बनाउन पाउँछ । यद्यपी पक्षले पनि २ पटक स्थगित गराउन पाउने भएकोले सरकारी वकिलले स्थगित गराउने अधिकार भने छ ।
सुप्रिम सहकारी ठगी प्रकरणमा पुर्पक्षका लागि थुनामा रहेका लामिछानेले आफ्नो हिस्साको बिगो रकम दाखिला गरे पनि जिल्ला अदालत रुपन्देहीका न्यायाधीश नारायण सापकोटाको इजलासले रिहा गर्न अस्वीकार गरेको थियो। त्यसविरुद्ध लामिछाने उच्च अदालत तुलसीपुर बुटवल इजलास पुगेका थिए। रिटमा कात्तिक २७ गरे भएको सुनुवाइमा अदालतले मुल अभियोगको सक्कल मिसिल झिकाउने आदेश दिएको थियो।
