काठमाडौं । राष्ट्रिय स्वतन्त्र पार्टीका सभापति रवि लामिछाने चितवनबाट सडकमार्ग हुँदै रुपन्देहीतर्फ लागेका छन्। काठमाडौँबाट विमानमा भरतपुर पुगेका उनी भरतपुरबाट सडकमार्ग हुँदै रुपन्देही जान लागेका हुन्।
बिहीबार उच्च अदालत तुलसीपुरको बुटवल इजलासले उनलाई थुनामुक्त गर्न आदेश दिएसँगै आवश्यक कागजी प्रक्रिया मिलाउन उनी रुपन्देही जान लागेका हुन्।
उनी बिहानैदेखि भैरहवा जान त्रिभुवन अन्तर्राष्ट्रिय विमानस्थलमा पर्खिए पनि मौसम खराबीका कारण भैरहवाको जहाज नउडेपछि उनी भरतपुरसम्म विमानमा गएका हुन्। उनलाई नेपाल प्रहरीको रोहबरमा भैरहवा लगिँदै छ। साथमै रहेका रास्वपा नेता गणेश पराजुलीले प्रहरीको स्कटिङमा लामिछाने चितवनबाट भैरहवातर्फ लागेको बताए। ‘लामिछाने आज नै भैरहवा पुगेर कागजी प्रक्रिया पूरा गर्न भ्याउनुहुन्छ होला,’ पराजुलीले भने।
उनलाई अदालतले शर्तसहित थुनामुक्त गर्न आदेश गरेको छ। उनी कागजी प्रक्रिया पूरा गरेर शुक्रबार नै छुट्नेछन्।
