काठमाडौं । प्रधानमन्त्री सुशीला कार्कीले नेपालका विभिन्न जातजातिले मनाउने मौलिक पर्वहरूले राष्ट्रिय एकता र सद्भावलाई थप मजबुत बनाउने बताएकी छन्।
तमु समुदायको महान् पर्व ‘तमु ल्होसार’ तथा दुरा समुदायको ‘म्हैप्रु नकुमा’ पर्वका अवसरमा आज एक शुभकामना सन्देश जारी गर्दै उनले स्वदेश तथा विदेशमा रहनुभएका सम्पूर्ण नेपालीहरूमा सुख, शान्ति र समुन्नतिको मङ्गलमय शुभकामना व्यक्त गरेकी हुन्।
प्रधानमन्त्री कार्कीले नेपालको बहुसांस्कृतिक पहिचान नै हाम्रो मौलिक सम्पत्ति भएको उल्लेख गर्दै यी चाडपर्वहरूले नेपालीहरूबीच आपसी भाइचारा र सहिष्णुताको भावना जागृत गराउने विश्वास व्यक्त गरेकी छन्।
उनले सामाजिक सञ्जालमार्फत शुभकामना दिँदै भनेकी छन्, “यी पर्वहरूले हाम्रो बहुसांस्कृतिक पहिचानलाई थप सुदृढ गर्दै आपसी एकता, शान्ति र सद्भाव बढाउन प्रेरणा प्रदान गरुन्।”
विविधतामा एकता नै नेपालको सुन्दरता रहेको चर्चा गर्दै प्रधानमन्त्रीले सबै समुदायको विकास र पहिचानले नै समृद्ध राष्ट्र निर्माण हुने कुरामा जोड दिएकी छन्।
तमु र दुरा समुदायको विशेष सांस्कृतिक महत्व बोकेका यी पर्वहरूले सबै नेपालीको जीवनमा उमङ्ग र सफलता ल्याओस् भन्ने कामना समेत उनले गरेकी छन्।
